Raj thakre Interview 8 Feb 2012 p1

सेनेने फक्त ओरबाडण्याचा कार्यक्रम केला -राज ठाकरे

सेनेने फक्त ओरबाडण्याचा कार्यक्रम केला -राज ठाकरे

संजीव साबडे ः सकाळ न्यूज नेटवर्क

Monday, February 06, 2012 AT 02:45 AM (IST)

मुंबई - शिवसेनेने मुंबईची अवस्था कशी करून टाकलीय हे सर्वच जण बघत आहेत. या मंडळींनी शहराला काहीच दिले नाही; मात्र ओरबाडले भरपूर. त्यांच्याकडे प्रचंड कल्पनादारिद्य्र आहे. आता बघा येणाऱ्या निवडणुकीत मनसेची सत्ता या शहरात येईल आणि कायापालट करून दाखवू आम्ही, अशा शब्दांत शिवसेनेचा समाचार घेत मनसेचे अध्यक्ष राज ठाकरे यांनी आगामी निवडणुकीत आपणच विजयी होणार, असा विश्‍वास व्यक्त केला. "सकाळ'ला दिलेल्या मुलाखतीत अनेक प्रश्‍नांना त्यांनी ठाकरी शैलीत उत्तरे दिली.


----------------------------------------------------------------
जिल्हा परिषद, पंचायत समिती आणि महानगरपालिकांच्या निवडणुकांच्या पार्श्वभूमीवर, दै. सकाळने विविध राजकीय पक्षांतील नेत्यांच्या मुलाखती घेतल्या आहेत. या मुलाखतींमध्ये नेत्यांनी आपले परखड विचार व्यक्त केले आहेत. या मुलाखती ई सकाळ विशेष या सेक्शनमध्ये सलगपणे कधीही वाचता येतील.
----------------------------------------------------------------

प्रश्‍न : चार महापालिकांमध्ये सत्ता येईल, असे तुम्ही कशाच्या आधारे सांगता?
राज : मुंबई, ठाणे, पुणे आणि नाशिक या चार महापालिकांवर आम्ही सुरवातीपासूनच लक्ष केंद्रित केले होते. गेल्या वेळीही तिथे आमचे नगरसेवक होते. पाच वर्षांच्या काळात त्या-त्या ठिकाणच्या सत्ताधाऱ्यांनी घातलेला गोंधळ मतदारांनी पाहिला आहे. शिवसेना, भाजप, कॉंग्रेस व राष्ट्रवादी कॉंग्रेस यांनी त्या महापालिकांमध्ये काय केले, त्या शहरांची कशी वाट लावली, हेही मतदारांना माहीत आहे. मुळात जनतेचा मनसेवर निश्‍चित विश्‍वास
आहे. आम्ही सत्तेत आल्यावर शहरांना नवा आकार देऊ, शहरांमध्ये चांगले रस्ते, चांगली इस्पितळे, बागा, मैदाने, बस वाहतूक देणे यावर आम्ही भर देऊ. चारही महापालिकांत सत्ता मिळेल, असा माझा दावा आहे. चारही शहरांत सध्या बजबजपुरी माजली आहे. ती मनसेच दूर करू शकतो.

प्रश्‍न : तुमच्या पक्षाला मुंबईत किती जागा मिळतील?
राज : आम्ही सत्तेवरच येणार. त्यामुळे सत्ता मिळविण्यासाठी लागणाऱ्या जागा आम्हालाच मिळणार.

प्रश्‍न ः गेली अनेक वर्षे मुंबई महापालिकेत शिवसेना-भाजप युतीची सत्ता आहे? ती तुम्ही कशी मोडून काढणार?
राज ः अहो, त्यांनी गेल्या पंधरा वर्षांत शहराची बजबजपुरी केली आहे. रस्त्यांवर खड्डे, पिण्यासाठी स्वच्छ पाणी नाही, आरोग्य व्यवस्था कोलमडलेली, पुरेशी स्वच्छतागृहे नाहीत. यामुळे लोक कंटाळले आहेत. ते पर्यटकांना काय दाखवतात? राणीची बाग, गेट वे ऑफ इंडिया, मस्त्यालय आणि समुद्र. मुंबई वसलेलीच आहे आणि बाकी साऱ्या वास्तू ब्रिटिशकालीन आहेत. युतीने गेल्या पंधरा वर्षांत कोणती नवी वास्तू उभारली, ते सांगा. त्यांनी शहर ओरबाडून खाल्ले. करून दाखवले, करून दाखवले, अशा जाहिराती कसल्या करता?

प्रश्‍न : निवडणुकीच्या तोंडावर सोलापूरचे मनसे अध्यक्ष व बऱ्याच पदाधिकाऱ्यांनी राजीनामे दिले आहेत.
राज : मला तेथील नेमकी माहिती नाही. पक्षात नाराजी असते. सर्वांना उमेदवारी देणे कोणालाच शक्‍य नसते. पण बंडखोरी असता कामा नये. तसे कोणी करीत असेल, तर मला त्यांची पर्वा नाही. त्यांनी खुशाल बाहेर जावे. निवडणुकीच्या तोंडावरच कशी नाराजी येते? पदे मिळाली तेही नाराज आणि न मिळाली, तेही नाराज? अर्थात या सर्वांतून मलाही कोण सच्चा, कोण कसा ते कळते आहे. बंडखोरी खपवून घेणार नाही.

प्रश्‍न : निवडणुका जाहीर झाल्यानंतर तुम्ही निवडणूक आयोग आणि आता मुंबई उच्च न्यायालयावरही टीका केली?
राज : अखेर निवडणूक आयोगाला एकाच दिवशी मतमोजणीचा निर्णय घ्यावाच लागला ना? खरे तर तो सुरवातीलाच घेतला असता, तर मला बोलायची वेळच आली नसती. हायकोर्टाने आम्हाला शिवाजी पार्कवर सभा घ्यायला परवानगी नाकारली. मग शिवसेनेच्या दसरा मेळाव्याला परवानगी कशी मिळते? ती मिळावी, म्हणून आर. आर. पाटील आणि नोकरशाही का धावपळ करते?

प्रश्‍न : पण तो सांस्कृतिक कार्यक्रम असतो?
राज : ते काय मेळाव्यात सांस्कृतिक भाषणे करतात? त्या वेळी आवाजाच्या मर्यादेचे उल्लंघन केले तरी चालते? शिवसेनेच्या दसरा मेळाव्याला म्हणे परंपरा आहे. अहो, पण शिवाजी पार्कलाही जाहीर सभांची परंपरा आहेच की. ती कशी विसरून चालेल? मुळात ते सार्वजनिक मैदान आहे की मनोरंजन उद्यान आहे, याचाच निर्णय हाय कोर्टाने दिलेला नाही. सायलेन्स झोन आहे, असे सांगतात. पण गल्लीऐवजी मैदानात फटाके उडवायला का संमती मिळते. जाणता राजा हा कार्यक्रमही तिथे झाला. सायलेन्स झोनमध्ये हे सारे कसे होऊ शकते? या साऱ्यांची उत्तरे न देता केवळ मनसेला स्वतःची ताकद दाखवता येऊ नये, म्हणून बंदी घालता की काय? तिथे राष्ट्रवादी वा कॉंग्रेस सभा घेऊ शकतच नाहीत. एक मी घेऊ शकतो आणि शिवसेना घेऊ शकते. अर्थात आमची सभा तिथे झाली नाही तर रस्त्यावरच होईल. मग लाखो लोकांना करा अटक हिंमत असेल तर.

प्रश्‍न : पण तुम्ही किती सभा घेणार आणि कुठे घेणार?
राज : माझे उद्यापासून रोड शो आहेत. चारही महापालिकांच्या शहरांत. नंतर 10 फेब्रुवारीला ठाणे, 11 ला पुणे,
12 तारखेला नाशिक आणि 13 फेब्रुवारीला मुंबईत सभा घेणार आहे. वेळही फार कमी आहे आणि मुंबईतील अन्य नेत्यांवर उमेदवार निवडून आणण्यासाठीची जबाबदारी टाकली आहे.

प्रश्‍न : उद्धव ठाकरे हे शिवसेनेचे नेते आहेत आणि तुमचे चुलत बंधूही?
राज : एक मिनीट...! जो स्वत:च्या जिवावर, शब्दांवर लोकांना निवडून आणू शकतो, तोच खरा नेता. यांना तर आताही शिवसेनाप्रमुख बाळासाहेब ठाकरे यांच्याच सभा घ्याव्या लागतात. लोक निवडून येतात, ते बाळासाहेबांमुळे. ते महाराष्ट्राचे नेते आहेत. ते आणि शरद पवार. पण शरद पवारही निवडून आलेल्यांची मोळी बांधून त्याची दोरी स्वतःच्या हातात ठेवतात. सतत इतर पक्षांतील लोकांना फोडणे हा राष्ट्रवादीचा जणू कार्यक्रमच आहे. लोक फोडून पक्षाची ताकद वाढत नसते.

प्रश्‍न : पृथ्वीराज चव्हाण, अजित पवार, गोपीनाथ मुंडे यांच्याविषयी काय सांगाल?
राज : पृथ्वीराज चव्हाण सज्जन आहेत. पण त्यांचा महाराष्ट्राशी काही संबंध नाही. वरून आणून बसवलेले ते नेते. कामे होतच नाही त्यामुळे. अजित पवार यांना खळखळून किंवा नुसते हसतानाचा एकही फोटो मी पाहिलेला नाही. एककल्ली आहेत ते. त्यांच्यात धमक असू शकेल. पण आपल्या पक्षात आपण एकटेच आहोत आणि इतर कोणीच नाही, असे त्यांना वाटते. गोपीनाथ मुंडेंविषयी मी म्हणेन की चक्रव्यूहात असताना प्रत्येकाने स्वतःला "बर्ड आय व्ह्यू'मधून पाहणे गरजेचे असते. प्रत्येकाच्या आयुष्यात अशी वेळ येते. लेझीम खेळताना दोन पाय पुढे, दोन पाय मागे टाकले जातात. त्यांना कोणी मागे येणे म्हणत नाही. कारण मिरवणूक पुढे जात असते.

सभा घ्यायची कुठे ते सांगा - राज

सभा घ्यायची कुठे ते सांगा - राज

- सकाळ न्यूज नेटवर्क

Saturday, February 04, 2012 AT 12:47 PM (IST)

  

मुंबई - "गिरगाव चौपाटी, आझाद मैदान आणि आता शिवाजी पार्कवरही जाहीर सभा घ्यायची नाही, तर सभा नक्की घ्यायची कुठे, हे एकदाचे सांगा,'' असा त्रागा महाराष्ट्र नवनिर्माण सेनेचे अध्यक्ष राज ठाकरे यांनी शुक्रवारी व्यक्त केला.

शिवाजी पार्कवरील मनसेच्या सभेला उच्च न्यायालयाने मनाई केल्यानंतर, "मैदान मिळत नसल्याने रस्त्यावरच सभा घेऊ,'' असा इशारा राज यांनी दिला.
""शिवसेनाप्रमुख बाळासाहेब ठाकरे यांच्या दसरा मेळाव्याला मैदान देताना झुकते माप दिले जाते; मात्र मनसेवर अन्याय केला जात आहे,'' असा आरोप करून राज म्हणाले, ""रस्त्यावर सभा घेतल्यास काय गुन्हे दाखल करायचेत ते करा.''

उच्च न्यायालयाचा निर्णय आल्यानंतर राज यांनी "कृष्णकुंज'वर पत्रकार परिषद घेतली व उच्च न्यायालयाच्या निर्णयावर नाराजी व्यक्त केली. मात्र, त्याच वेळी "मी न्यायालयाचा कोणताही अपमान करीत नाही,' असे सांगितले.

राज म्हणाले, "या देशात मतस्वातंत्र्य असून सार्वभौम देशातील नागरिक म्हणून मला माझे मत मांडण्याचा पूर्ण अधिकार आहे.'' राज यांनी थेट उच्च न्यायालयाच्या आदेशावर व्यक्त केलेली नाराजी चर्चेचा विषय ठरली आहे. राज म्हणाले, ""एक परंपरा म्हणून शिवसेनेच्या दसरा मेळाव्याला परवानगी दिली जाते. पण त्याच वेळी आम्ही निवडणुकीच्या काळात पहिल्यांदाच "शिवाजी पार्क' मागितल्यावर त्याला मनाई करण्यात येत असल्याबद्दल मला आश्‍चर्य वाटते. हाच प्रकार रस्त्यावरील सभांनाही येत असतो. कुठे रुग्णालयाच्या नावाखाली; तर कुठे शाळांच्या नावाखाली सभांना परवानगी नाकारली जात आहे. शाळा सायंकाळी सुटल्यावरही रात्रीच्या सभांना परवानगी नाकारली जाते. या शाळा काय रात्रशाळा आहेत का?''

"जर निवडणुकीतच आपले मत व्यक्त करण्यासाठी संधी मिळत नसेल तर निवडणुका घेता कशाला,'' असा प्रश्‍न उपस्थित करून निवडणुकाच रद्द करण्याची मागणी राज यांनी या वेळी केली.

शिवसेनेच्या दसरा मेळाव्याला राज यांनी "लक्ष्य' केल्याने भविष्यात दसरा मेळाव्यासाठी परवानगीतील शिवसेनेच्या अडचणी वाढणार असल्याचे मानले जात आहे

देवी एकवीरा, मार्तंडा "मनसे'ला पाव रे!

देवी एकवीरा, मार्तंडा "मनसे'ला पाव रे!

- सकाळ वृत्तसेवा

Thursday, February 02, 2012 AT 03:45 AM (IST)

  जेजुरी - महाराष्ट्र नवनिर्माण सेनेचे अध्यक्ष राज ठाकरे यांनी आज जेजुरीत खंडोबाचे दर्शन घेतले. मनसेच्या उमेदवारांची यादी खंडोबाच्या चरणाशी ठेवून त्यांनी विजयाचे जणू खंडोबाला साकडेच घातले.

मोरगाव येथील मयूरेश्‍वराचे दर्शन घेऊन राज ठाकरे साडेतीन वाजता गडावर आले. त्यांच्यासमवेत मनसेचे नेते आमदार बाळा नांदगावकर, शिरीष पारकर, शिशिर शिंदे, मनसेचे जिल्हा अध्यक्ष बाबा जाधवराव आदी उपस्थित होते. खंडोबाची पूजा करण्यात आली. देवदर्शन व तळी-भंडारा करून त्यांनी भंडारा उधळून कुलधर्म-कुलाचार केला. मार्तंड देवसंस्थानच्या वतीने त्यांचा सत्कार करण्यात आला. त्यानंतर ते सासवडकडे मार्गस्थ झाले. निवडणूक व इतर विषयासंदर्भात त्यांनी बोलण्यास नकार दिला. हा खासगी दौरा असल्याचे निकटच्या कार्यकर्त्यांनी सांगितले. त्यामुळे ते पत्रकारांशी बोलले नाहीत.

इच्छुकांना हुलकावणी
लोणावळा ः राज ठाकरे यांनी मुंबई व ठाणे महापालिकांचा निवडणूक जाहीरनामा कार्ला गडावरील कुलदैवत एकवीरा देवीच्या चरणी अर्पण केला.
आमदार बाळा नांदगावकर व काही निवडक कार्यकर्त्यांसह ठाकरे बुधवारी वेहेरगाव-कार्ला येथील एकवीरा देवीच्या दर्शनासाठी आले होते. मनोभावे पूजा करत निवडणुकीत यश मिळू दे, अशी प्रार्थना केली. त्यानंतर लगेच ते मुंबईस रवाना झाले.
महापालिका निवडणुकीत तिकीट मिळालेल्या व इच्छुक उमेदवारांना हुलकावणी देत ठाकरे कार्ल्यास आले होते. मात्र, सहलीसाठी आलेल्या शाळेतील विद्यार्थ्यांनी राज ठाकरे यांना पाहताच जोरदार घोषणाबाजी केल्याने ठाकरेही चकित झाले.

निवडणुकीच्या तोंडावर...
जेजुरीचा खंडोबा हे ठाकरे यांचे कुलदैवत आहे. राज ठाकरे हे यापूर्वी विधानसभा निवडणुकीच्या तोंडावर जेजुरीत आले होते. त्या वेळी त्यांनी जेजुरीत खंडोबाला साकडे घातले होते. आता महापालिका व जिल्हा परिषद निवडणुकीच्या तोंडावर त्यांनी खंडोबाच्या दर्शनासाठी येऊन विजयासाठी साकडे घातल्याची कार्यकर्त्यांमध्ये चर्चा होती

राज ‘निकाला’वर ठाम

राज ‘निकाला’वर ठाम
विशेष प्रतिनिधी , मुंबई
‘ज्यांना उमेदवारी मिळणार नाही, अशा सर्वाच्या घरच्यांची मी माफी मागतो,’ असे मनसेचे अध्यक्ष राज ठाकरे यांनी जाहीर केल्यानंतरही राज यांनी उमेदवारांची यादी जाहीर करताच मुंबई व ठाण्यात नाराजीची लाट निर्माण झाली. राज यांच्या कृष्णभुवन या निवासस्थानी रविवारपासून सोमवार सायंकाळपर्यंत आपली कैफियत मांडण्यासाठी नाराजांचे तांडे येत होते. दादरमधील २२ उपशाखाध्यक्षांनी व ८४ गटाध्यक्षांनी तर राजीनामे दिल्याचे सांगण्यात येत होते. मात्र कोणीही राजीनामे दिलेले नाहीत, तसेच नाराज असले तरी कोणी बंडखोरी केली नसल्याचे राज ठाकरे यांनी सांगितले. त्याचप्रमाणे कोणत्याही परिस्थितीत यादी बदलणार नाही, असेही त्यांनी स्पष्ट केले. इतक्या लोकांनी नाराजी व्यक्त केली याचाच अर्थ मी विजयाच्या किती जवळ आहे ते स्पष्ट होते असे सांगून राज म्हणाले, मी छातीठोकपणे यादी जाहीर केली आहे. मागच्या दाराने गुपचूप उमेदवारी देण्याचा धंदा केलेला नाही.
मनसेची यादी रविवारी जाहीर झाल्यानंतर दहिसरपासून मुंबईभर नाराजीचा स्फोट झाला. अनेक ठिकाणी महिलांच्या उमेदवारीवरून नाराजी निर्माण झाली. काही आमदारांनी खाजगीत आपला असंतोष व्यक्त केला, तर ठाण्यात नाराजांचे तांडे थेट पक्षकार्यालयावर चालून गेले. काही नाराजांनी आपल्या शाखांवरील राज यांची छायाचित्रे उतरवून शाखांना टाळे ठोकले व मनसेला ‘जय महाराष्ट्र’ केला. राज यांच्या बालेकिल्ल्यात प्रभाग १८५ मधून विभाग अध्यक्ष संदीप देशपांडे यांना उमेदवारी जाहीर झाल्याने शाखाअध्यक्ष गिरीश धानुरकर यांच्या शाखेतील बावीस उपशाखाध्यक्ष व ८४ गटाध्यक्षांनी आपले राजीनामे आमदार नितीन सरदेसाई यांच्याकडे सादर केले. याबाबत सरदेसाई यांच्याशी संपर्क होऊ शकला नाही. सोमवारी दिवसभर आमदार मंगेश सांगळे, राम कदम, बाळा नांदगावकर, प्रवीण दरेकर हे आपापल्या मतदारसंघातील नाराजांची समजूत काढण्याचे काम करत होते. मात्र अनेक नाराजांनी थेट कृष्णभुवन गाठले. रविवार दुपारपासून पहाटे पाचपर्यंत राज ठाकरे हे स्वत: नाराजांना भेटून त्यांची समजूत काढत होते. सोमवारी सायंकाळपर्यंत अनेक विभागातील नाराजांनी राज यांची भेट घेतली. याबाबत राज ठाकरे यांना विचारले असता, ज्यांना उमेदवारी मिळाली नाही, अशांनी नाराज होणे स्वाभाविक आहे. मात्र त्यातील एकही बंडखोर नाही. या नाराजांची समजूत काढण्यात आली आहे. तसेच दादरमधील शाखाध्यक्ष गिरीश धानुरकर, यशवंत किल्लेदार यांची समजूत काढण्यात आली असून, एकाही पदाधिकाऱ्याने राजीनामा दिला नसल्याचे त्यांनी सांगितले. ‘मनसेच्या कार्यकर्त्यांबरोबर ही वर्षांनुवर्षे जपलेली नाती आहेत. मी त्यांची समजूत काढीन, मात्र यादी बदलणार नाही,’ असेही राज यांनी स्पष्ट केले

यंदा किंगमेकर नाही, किंग असू - राज ठाकरे

यंदा किंगमेकर नाही, किंग असू - राज ठाकरे

- सकाळ वृत्तसेवा

Sunday, January 29, 2012 AT 02:36 PM (IST)

 

मुंबई - आगामी महापालिका निवडणुकांमध्ये महाराष्ट्र नवनिर्माण सेना (मनसे) पक्ष किंगमेकरची भूमिका न बजाविता किंग असेल, असा विश्वास मनसेचे अध्यक्ष राज ठाकरे यांनी आज (रविवार) व्यक्त केला.

राज ठाकरे यांनी आज आगामी महापालिका निवडणुकांच्या पार्श्वभूमीवर पुणे, मुंबई, ठाणे आणि नाशिक महापालिकांसाठी उमेदवारांच्या नावांची घोषणा केली. तर नागपूर, सोलापूर आणि उल्हासनगर येथील स्थानिक कार्यकर्ते यादी जाहीर करणार असल्याचे त्यांनी स्पष्ट केले. राज ठाकरे यांनी मुंबई महापालिकेतील २२७ पैकी २०८ जागांसाठी, ठाण्यातील १३० पैकी ११५ जागांसाठी, नाशिकमधील १२२ पैकी ११५ जागांसाठी आणि पुण्यातील १५२ पैकी १३८ जागांसाठी आपल्या उमेदवारांची यादी जाहीर केली.

यावेळी बोलताना राज ठाकरे म्हणाले, ''महाराष्ट्रातून जातीपातीचे राजकारण काढून टाकू, असे आपण कायम म्हणतो. मात्र, जातींना आरक्षण देऊन याला पाठबळ देण्यात येते. पक्षातील नवीन चेहऱ्यांना संधी देण्याचा मी प्रयत्न केला आहे. ज्या उमेदवारांना उमेदवारी मिळालेली नाही, त्यांची आणि त्यांच्या कुटुंबियांची मी माफी मागतो. प्रसिद्ध केलेल्या यादीत उमेदवारांच्या नावासोबत उमेदवारांचे परीक्षेतील मार्कही देण्यात आले आहेत.

आम्ही प्रश्‍नही विचारायचे नाहीत का? -राज ठाकरे

आम्ही प्रश्‍नही विचारायचे नाहीत का? -राज ठाकरे

- सकाळ वृत्तसेवा

Tuesday, January 24, 2012 AT 01:59 PM (IST)

  

मुंबई - राज्य निवडणूक आयोगाच्या भूमिकेवर घणाघाती टीका करीत महाराष्ट्र नवनिर्माण सेनेचे अध्यक्ष राज ठाकरे यांनी आज (मंगळवार) आम्ही प्रश्‍नही विचारायचे नाहीत का? असा सवाल केला. प्रश्‍न विचारल्याने आयोगाचा अवमान कसा होतो, असा मुद्दाही त्यांनी यावेळी उपस्थित केला.

राज ठाकरे म्हणाले,""निवडणूक आयोग आयोगासारखे वागल्यास आम्ही प्रश्‍न विचारणार नाही. मात्र त्यात फारकत आढळून आल्यास आम्हाला तोंड उघडावे लागेल. कुणाच्या मनात शंका निर्माण होतील, असे आयोगाचे वर्तन नको. आम्ही प्रश्‍न विचारल्यावर आयोगाचा अवमान होतो, असे कसे काय म्हणता येईल? जिल्हा परिषद निवडणुकांचा निकाल जाहीर झाल्यावर महापालिकेच्या निवडणुका घेणे सर्वथा चुकीचे आहे. मतदान यंत्रांची कमतरता असल्याचे निवडणूक आयोगाकडून सांगण्यात येत आहे. मात्र सध्या केवळ पाच राज्यात निवडणुका सुरू आहेत. इतर राज्यातून यंत्रे आणता येतील. एकाच दिवशी सर्व निकाल जाहीर करण्याची आमची मागणी आहे.''

मुंबई बॉम्बस्फोटांसदर्भात राज ठाकरे म्हणाले,""13 जुलै 2011 रोजी झालेल्या बॉम्बस्फोटांचा संबंध उत्तर प्रदेश आणि बिहार या राज्यांशी असल्याचे वक्तव्य मी केले होते. काल दहशतवाद विरोधी पथकाने केलेल्या दाव्यावरून ते खरे ठरले आहे. या बॉम्बस्फोटांचा कट बिहारमध्येच रचण्यात आला आहे. मी काही बोललो की लोकांना ते खोटे वाटते. परंतु, इतरांनी सांगितल्यावर विश्‍वास बसतो.''

निवडणुकीबाबत ठाकरे म्हणाले,""जास्तीत जास्त जागांवर मनसेच्या उमेदवारांना संधी दिली जाईल. काही ठिकाणी पर्याय नसल्यास युतीचा विचार केला जाईल. मात्र मनसेच्या कोणत्याही कार्यकर्त्यावर अन्याय होणार नाही.'