मनोमीलन चळवळीकडे राजची पाठ

मनोमीलन चळवळीकडे राजची पाठ

सकाळ वृत्तसेवा

Monday, September 06, 2010 AT 12:15 AM (IST)

मुंबई  -  महाराष्ट्र नवनिर्माण सेनेचे अध्यक्ष राज ठाकरे आणि शिवसेनेचे कार्याध्यक्ष उद्धव ठाकरे यांच्या मनोमीलनासाठी सुरू झालेल्या प्रयत्नांत आज दोन्ही बंधूंनी कोलदांडा घातला. त्यामुळे मनोमीलनाचा संदेश घेऊन आज "कृष्णकुंज' व "मातोश्री'वर गेलेल्या कार्यकर्त्यांची मने काहीशी खट्टू झाली. लेखी पूर्वकल्पना देऊनही राज यांनी घरी न राहणेच पसंत केले. दुसरीकडे उद्धव यांनी मात्र कार्यकर्त्यांची भेट घेतली; मात्र त्यांचे निवेदन स्वीकारण्यास नकार दिला.

शिवसेना-"मनसे'तील दुहीमुळे हतबल झालेल्यांनी "माझी चळवळ, मी महाराष्ट्राचा' याअंतर्गत आज सकाळी शिवाजी पार्क येथील स्वर्गीय मीनाताई ठाकरे यांच्या पुतळ्याला हार घालून मूकमोर्चा काढला. राज व उद्धव यांनी महाराष्ट्राच्या हितासाठी पुन्हा एकत्र यावे, यासाठी शिवाजी पार्क येथे स्वाक्षरी मोहीमही राबविण्यात आली. त्यास शेकडोच्या संख्येने उपस्थित राहून नागरिकांनी चांगला प्रतिसादही दिली. विशेष म्हणजे मोर्चाला ज्येष्ठ शिवसैनिकांची उपस्थितीही लक्षणीय होती. शिवसेनेचे लोकसभेचे उमेदवार व माजी आमदार सुरेश गंभीर हेही मोर्चात सहभागी झाले होते; पण "प्रजा उत्साही मात्र, राजा उदासीन' असेच काहीसे चित्र या मोर्चादरम्यान पाहायला मिळाले. लेखी पूर्वकल्पना देऊनही राज यांनी घरी न राहणेच पसंत केले. दुसरीकडे उद्धव यांनी मात्र कार्यकर्त्यांची भेट घेतली; मात्र त्यांनी निवेदन स्वीकारण्यास नकार दिला.

या वेळी बोलताना उद्धव म्हणाले, ""हे आंदोलक मॉंसाहेबांच्या पुतळ्याला वंदन करून निघाले आहेत आणि घरी आलेल्यांचा सन्मान करणे ही "मॉं'चीच शिकवण असल्यामुळे मला यांची भेट घेणे भागच आहे. अन्यथा, हे कोणत्या उद्देशाने येथे आलेत यात मला रस नाही. राहिला भाग मराठी माणसाच्या हिताचा, तर शिवसेनेचा जन्मच मुळी मराठी माणसाच्या हितासाठी झाला आहे. मराठी माणसाने भगव्याखाली एकत्र यावे तरच मराठी माणसाची ताकद वाढेल.''

दरम्यान, आज आमची सहामाही परीक्षा असून त्यात आम्ही काठावर पास झालो. आंदोलनाचा दुसरा टप्पा दसऱ्याच्या दिवशी असून याची फायनल 23 जानेवारी, 2011 ला होणार आहे. तेव्हा आम्ही प्रचंड जाहीर सभा घेऊन या नेत्यांना एकत्र येण्यास भाग पाडू, असा विश्‍वास या चळवळीचे प्रवक्ते सतीश वळंजू यांनी व्यक्त केला.