रोजगारप्राप्तीसाठी "मनसे'ची पाठशाळा

रोजगारप्राप्तीसाठी "मनसे'ची पाठशाळा
सकाळ न्यूज नेटवर्क
Tuesday, January 12, 2010 AT 12:15 AM (IST)

मृणालिनी नानिवडेकर
मुंबई - महाराष्ट्र नवनिर्माण सेनेने परिसरात निर्माण होणारे रोजगार परप्रांतीयांच्या हाती न जाता मराठी माणसाच्या ताब्यातच ठेवण्याची शिकवणी सुरू केली आहे. मात्र, ही शिकवण "मनसे स्टाइल' दणके-राड्यांची नसून नोकरी-रोजगार मिळविण्यासाठी आवश्‍यक कौशल्ये अंगी बाणवण्याबद्दलची आहे.

राज्यातील सर्व जिल्हे आणि तालुक्‍यांत "मनसे'ने रोजगार आणि स्वयंरोजगार विभागाची स्थापना केली आहे. अलीकडेच नाशिकजवळ या विभागातील पदाधिकाऱ्यांचे दोन दिवसांचे शिबिर आयोजित करण्यात आले होते. शिवसेनेत असताना राज ठाकरे शिवउद्योग सेना, बेरोजगारांचा विधानसभेवरील मोर्चा अशा तरुणांच्या जिव्हाळ्याच्या विषयांना हात घालतच प्रकाशात आले होते.

मराठी तरुणांच्या हाताला काम हे आमचे प्रमुख उद्दिष्ट असून, त्यासाठी आता "मनसे'चा रोजगार-स्वयंरोजगार विभाग काम करेल, असे पक्षाचे प्रवक्‍ते शिरीष पारकर यांनी स्पष्ट केले. निवडणुकीची दगदग संपल्यानंतर आता या कामाला नियोजनबद्ध प्रारंभ झाला असून, ताज्या शिबिरात भविष्यातील योजनांविषयी चर्चा करण्यात आली. महाराष्ट्रात उभ्या राहणाऱ्या प्रत्येक उद्योगात उपलब्ध रोजगारातील 80 टक्‍के नोकऱ्या स्थानिकांना दिल्या पाहिजेत, असा शासनाचा कायदा असून, शासनाचे ते परिपत्रक लागू करणे उद्योजकांना बंधनकारक करण्याचे मार्ग कोणते, याविषयी मार्गदर्शन करण्यात आले. राज्याच्या विविध भागांत उभ्या राहणाऱ्या प्रकल्पांची यादी "मनसे'कडे असून, ती त्या-त्या विभागातील प्रमुखांना देण्यात आली आहे. भूमिपुत्रांना रोजगार देण्यासाठी सक्‍तीचा बडगा उभारतानाच मराठी माणसाने नव्या स्वरूपातले रोजगार व नोकऱ्या मिळविण्याच्या कौशल्यांचा अभ्यासक्रमही "मनसे'ने तयार केला आहे. रोजगार व स्वयंरोजगार विभागाचे प्रमुख सुनील बसाखेत्रे हे स्वत: कामगार कायद्यातले तज्ज्ञ असून, बहुराष्ट्रीय कंपन्यांचे सल्लागार म्हणून त्यांचा लौकिक आहे. मराठी मुले सेवाक्षेत्रातील नव्या संधी मिळवायला बिचकतात हे लक्षात घेत "मनसे'च्या माध्यमातून लवकरच ठिकठिकाणी व्यक्तिमत्त्व विकास, इंग्रजी संभाषण, संगणकीय कौशल्य, वेळेचे व्यवस्थापन याविषयीची शिबिरे आयोजित करण्यात येणार आहेत. या शिबिरात होतकरू तरुणांना प्रशिक्षण दिले जाईल.

मुंबईत रिटेल सेवांना आवश्‍यक असणारे तज्ज्ञ मनुष्यबळ तयार करण्यासाठी आवश्‍यक मार्गदर्शन पक्षाने यापूर्वीच सुरू केले असून, चार तासांच्या या शिकवणी वर्गाला हजर राहणाऱ्या तरुणांना नोकऱ्याही मिळाल्या आहेत. आता हा कार्यक्रम राज्याच्या सर्व भागांत मोठ्या प्रमाणात राबविण्यात येणार आहे. मुंबईतील प्रत्येक विधानसभा मतदारसंघात रोजगार-स्वयंरोजगार विभागाचा संघटक नेमण्यात आला आहे. ठाणे आणि पुणे येथे 15-20 जणांचा चमू सक्रिय आहे. पुणे येथील 80 टक्‍के नियुक्‍त्या पूर्ण झाल्या आहेत. नाशिक या "मनसे'च्या बालेकिल्ल्यातही विभागाचे काम सुरू झाले आहे. अमरावती, अकोला, नगर, जळगाव येथेही काम सुरू झाले असून, युवकांची मते मिळवायची असतील तर त्यांच्या सर्वाधिक जिव्हाळ्याच्या नोकरीधंद्याबाबतच काहीतरी ठोस करणे राज ठाकरे यांना आवश्‍यक वाटत असल्याचे सांगण्यात येते.

राज ठाकरे ठरले 'युथ आयकॉन'

Tuesday, January 12, 2010 AT 01:05 AM (IST)


'ई सकाळ' आणि '५४३२१ एसएमएस सेवा' यांनी घेतलेल्या 'सांगा तुमच्या मनातील युथ आयकॉन' उपक्रमात महाराष्ट्र नवनिर्माण सेनेचे प्रमुख राज ठाकरे यांना सर्वाधिक ५६ टक्के लोकांनी पसंती दिली आहे. त्याखालोखाल २६/११ च्या मुंबई हल्ल्यावेळी शौर्य बजावणारे पोलीस अधिकारी विश्‍वास नांगरे-पाटील यांचे नाव 'युथ आयकॉन' म्हणून ऑनलाईन वाचकांनी आणि तरूणाईने 'एसएमएस'द्वारे सुचविले आहे. आज (१२ जानेवारी) युवा दिन. त्यानिमित्त आपल्या मनातील युथ आयकॉन कळविण्याचे आवाहन गेल्या आठवड्यात 'ई सकाळ'ने वाचकांना केले होते.

'ई सकाळ'वरील आवाहनाला जगभरातून वाचकांनी भरभरून प्रतिसाद दिला. कोणतेही विशिष्ट नाव समोर न ठेवता ऑनलाईन वाचकांना त्यांच्या दृष्टिने कोण 'युथ आयकॉन' वाटतो, हे सांगण्यास सुचविले होते. त्यातून या आवाहनावर जगभरातून सुमारे दीड हजार प्रतिक्रिया वाचकांनी 'ई सकाळ'वर पोस्ट केल्या. या प्रतिक्रियांमधून वाचकांनी सर्वाधिक संख्येने निवडलेल्या नावांवर '५४३२१ एसएमएस' सेवेमार्फत मतचाचणी घेण्यात आली. या दोन्ही प्रक्रियांमधून तरूणाईने त्यांच्या मनातील 'युथ आयकॉन'वर शिक्कामोर्तब केले. ठाकरे, नांगरे पाटील यांच्यासह क्रिकेटचा बादशाह सचिन तेंडूलकर, अभिनेता अमीर खान, माजी राष्ट्रपती डॉ. ए. पी. जे. अब्दुल कलाम, कॉंग्रेसचे युवा नेते राहूल गांधी, समाजसेवक प्रकाश आमटे, 'इन्फोसिस'चे संस्थापक नारायण मूर्ती, शिवसेना कार्याध्यक्ष उद्धव ठाकरे आणि भाजपचे राष्ट्रीय अध्यक्ष नितिन गडकरी अशी एकूण दहा नावे 'युथ आयकॉन' म्हणून वाचकांनी सुचविली होती.

कृष्ण कुंज'ची सुरक्षा होणार अधिक कडेकोट

कृष्ण कुंज'ची सुरक्षा होणार अधिक कडेकोट
सकाळ वृत्तसेवा
Friday, January 01, 2010 AT 12:15 AM (IST)

मुंबई - महाराष्ट्र नवनिर्माण सेनेचे अध्यक्ष राज ठाकरे यांची सुरक्षा व्यवस्था आता अधिक कडेकोट होणार आहे. त्यांच्या "कृष्ण कुंज' निवासस्थानाच्या कम्पाऊंडच्या भिंतींची उंची वाढविण्याचे काम सध्या जोमाने चालू असून, प्रवेशद्वाराची रचनाही बदलण्यात येणार असल्याचे सांगण्यात येते.

राज ठाकरे यांना यापूर्वीही काही वेळा धमकी आली होती. समाजवादी पक्षाचे मध्य प्रदेशमधील माजी आमदार समरिते यांनीही राज ठाकरे यांच्यासाठी एक कोटीची सुपारी दिली होती; तर काही दिवसांपूर्वीच अखिल भारतीय ब्राह्मण सभेनेही राज ठाकरे यांना थप्पड मारून दाखविणाऱ्यास एक कोटीचे बक्षीस जाहीर केले होते. तत्पूर्वी मुंबईत मनसेने केलेल्या परप्रांतीयांच्या आंदोलनाच्या वेळी राज यांना सुरक्षा द्यावी, अशी मागणी सातत्याने केली जात होती. विधिमंडळाच्या नागपूर येथील हिवाळी अधिवेशनात राज ठाकरे यांना सुरक्षा देण्याची मागणी मनसेच्या नवनिर्वाचित आमदारांनी वारंवार विधानसभेत केली होती. त्यानंतर राज यांना वाय दर्जाची सुरक्षा व्यवस्था देण्याची घोषणा झाली होती. या व्यवस्थेमध्ये दोन कार्बाईनधारी पोलिस व एका पोलिस उपनिरीक्षकाचा समावेश आहे. ही सुरक्षा मिळाल्यानंतर राज यांचे निवासस्थान असलेल्या शिवाजी पार्क येथील कृष्ण कुंज इमारतीच्या सुरक्षा भिंतीच्या दुरुस्तीचे काम हाती घेण्यात आले आहे. सध्याची सुरक्षा भिंतीची उंची कमी असल्यामुळे भिंतींच्या पलीकडचे सहज दिसते; पण सुरक्षिततेच्या दृष्टिकोनातून भिंतींची उंची 12 फुटांपर्यंत वाढविण्यात येणार आहे. तसेच राज ठाकरे यांच्या निवासस्थानी असलेल्या सध्याच्या प्रवेशद्वाराची रचनाही बदलण्यात येणार असल्याचे सांगण्यात येते. सध्याच्या साध्या गेटऐवजी उंच रेलिंगचे गेट बसविण्यात येणार आहे. राज ठाकरे यांच्या सुरक्षिततेच्या दृष्टिकोनातून हे बदल करण्यात आल्याचे मनसेच्या एका पदाधिकाऱ्याकडून सांगण्यात आले

महाराष्ट्र केसरी' बनकरने घेतली राज ठाकरेंची भेट

महाराष्ट्र केसरी' बनकरने घेतली राज ठाकरेंची भेट
-
Sunday, December 20, 2009 AT 01:54 PM (IST)


मुंबई - 'महाराष्ट्र केसरी' हा किताब पटकावलेल्या विजय बनकर याने आज महाराष्ट्र नवनिर्माण सेनेचे अध्यक्ष राज ठाकरे यांची भेट घेतली. कुस्तिगीरांना मदत करण्यासाठी ट्रस्ट स्थापन करण्यात येणार असून, 'हिंद केसरी' स्पर्धेसाठी बनकर यांना आवश्‍यक ती आर्थिक मदत देण्याचेही राज यांनी आश्‍वासन दिल्याची माहिती मनसेचे आमदार रमेश वांजळे यांनी प्रसिद्धिमाध्यमांना दिली.

राज ठाकरे यांच्या भेटीला बनकर हे चांदीची गदा घेऊनच आले होते. त्यांच्यासोबत खडकवासल्याचे आमदार रमेश वांजळे होते. त्यांनीच ही भेट घडवून आणली. वांजळे हेही कुस्तीपटू असून विजय बनकर यांच्या वडिलांकडून त्यांनी तालमीत कुस्तीच्या डावपेचांचे प्रशिक्षण घेतले होते.

बनकर यांनी महाराष्ट्र केसरी किताब पटकावल्यानंतर त्यांनी आता "हिंद केसरी' कुस्ती स्पर्धेवर लक्ष केंद्रित केले आहे. तरुणांनी क्रिकेट आणि अन्य खेळाडू बनण्यापेक्षा कुस्तीपटू व्हावे, त्यामुळे आरोग्यही तंदुरुस्त राहते, असा सल्लाही बनकर यांनी या वेळी दिला.

राष्ट्रीय व आंतरराष्ट्रीय पातळीवर कुस्ती स्पर्धांसाठी कुस्तिगीरांना मदत करण्यासाठी व त्यांच्यातील होतकरू पैलवानांना पुढे आणण्यासाठी मनसेच्या वतीने ट्रस्ट स्थापन केला जाईल. यासंबंधीची बैठक जानेवारी महिन्यात होईल, असे आश्‍वासन राज ठाकरे यांनी दिल्याचे आमदार वांजळे यांनी सांगितले.

स्वतंत्र विदर्भासाठी गरज भासल्यास सार्वमत घ्या - राज

सकाळ वृत्तसेवा
Tuesday, December 15, 2009 AT 01:39 PM (IST)

नागपूर - विकासासाठी राज्याचे विभाजन मान्य नसल्याचे सांगत महाराष्ट्र नवनिर्माण सेनेचे प्रमुख राज ठाकरे यांनी वेगळ्या विदर्भाचा मुद्दा फेटाळला. विदर्भ वेगळा करायचाच असेल तर त्यासाठी सार्वमत घ्या, अशी मागणी त्यांनी आज टिळक पत्रकार भवनात आयोजित पत्रपरिषदेत केली. शेतकऱ्यांच्या आत्महत्या आणि नक्षलवादावरही त्यांनी मत मांडले.

केंद्र सरकारने तेलंगणा राज्यनिर्मितीस हिरवा कंदील दाखविल्यानंतर स्वतंत्र विदर्भाच्या मागणीने जोर धरला. या मागणीचे इतर पक्षांनी समर्थन केले तर शिवसेनेने विरोध दर्शविला. मनसेची भूमिका मात्र गुलदस्त्यात होती. मनसे आमदार "भूमिका साहेब स्पष्ट करतील' असे सांगत होते. त्यामुळे राज ठाकरे नेमकी काय भूमिका मांडणार, याकडे संपूर्ण राज्याचे लक्ष लागले होते. या पार्श्‍वभूमीवर ठाकरे यांनी आज स्वतंत्र विदर्भाला स्पष्ट विरोध दर्शविला. महाराष्ट्र सुवर्णमहोत्सवी वर्षात पदार्पण करीत असताना त्याच्या विभाजनाची मागणी योग्य नसल्याचे मत त्यांनी प्रारंभीच मांडले. वेगळ्या राज्याच्या मुद्द्याबाबत डॉ. बाबासाहेब आंबेडकरांनी नोंदविलेले निष्कर्ष पत्रकारांकडून उपस्थित झाल्याचे पाहून त्यांनी "त्यावेळेची स्थिती वेगळी होती. आता बाबासाहेबांना या विषयात उपस्थित करू नका', असे सांगितले. "हा विषय वेगळ्या वळणावर नेऊ नका, तुम्ही माझ्याकडून काहीही वदवून घेऊ शकणार नाही,' असे त्यांनी स्पष्ट केले.

विदर्भात ज्या पक्षाला भरभरून मते मिळाली, ज्यांचे आमदार, खासदार सर्वाधिक काळ विदर्भातून निवडून आले, त्यांनी आपल्या पक्षाच्या नेत्यांना या मुद्द्यासाठी धारेवर धरावे, असा सल्लाही त्यांनी दिला. ठराविक "कोंडाळे'च हे तुणतुणे वाजवत असल्याचे ते म्हणाले. सर्वाधिक काळ सत्तेत असणाऱ्यांनी ज्या पद्धतीने बारामतीचा विकास घडविला तो विकास उर्वरित महाराष्ट्रात का झाला नाही, असा प्रश्‍न करून "मतदारांनी डॉक्‍टर बदलविण्याची गरज आहे', असे मत त्यांनी नोंदविले. व्यसनापोटी शेतकरी आत्महत्या करतात, हे मला मान्य नसल्याचे राज म्हणाले. वर्षानुवर्षे होणारा अन्याय, त्यामुळे वैदर्भीयांच्या मनात असलेली खदखद, राग समजून घ्यायचा आहे. येथील ज्वलंत प्रश्‍न समजून त्यावर काय उपाय करता येईल, याचा अभ्यास करणार आहे. त्यानंतर "विदर्भ विकासाचा अजेंडा' तयार करेन, असे ते म्हणाले.

नक्षलवाद्यांमध्ये कोण आहे, त्यांची पाठराखण कोण करीत आहेत, ते समजून घेण्याची आवश्‍यकताही त्यांनी विदित केली. संसदेवरील हल्ल्यात शहीद झालेल्यांच्या श्रद्धांजली कार्यक्रमाला केवळ 14 खासदार उपस्थित राहत असतील तर त्यांची संवेदनशीलता लक्षात घ्यावी, असेही राज म्हणाले.

नेते आणि बिल्डरांमधील साटेलोटे उपस्थित करून राज यांना बोलते करण्याचा प्रयत्न पत्रकारांनी केला. मात्र, त्यावर त्यांनी थेट बोलण्याचे टाळले. विदर्भातच काय, कृष्णा खोरे बांधकामातही भ्रष्टाचार झाल्याचे ते म्हणाले. हे प्रश्‍न वारंवार येत असल्याचे पाहून त्यांनी "तुम्हाला माझ्याकडून अविनाश भोसलें'चे नाव वदवून घ्यायचे आहे काय, असा प्रश्‍नही त्यांनी केला.

चौफेर फलंदाजी
राज यांनी नेहमीप्रमाणे आपल्या खास शैलीत आज पत्रकारांना टोलवले. एका प्रश्‍नावर त्यांनी "वाद घालता की प्रश्‍न करता', असा सवाल केला. तर, येथील पत्रकारांना बोलू द्या, उद्या तुमच्याशी मुंबईत बोलेन, अशी गुगली मुंबईच्या पत्रकारांना टाकली. पत्रकार संघाचे मंचावरील प्रतिनिधी प्रश्‍न करीत असल्याचे पाहून "मला चक्क घेरलं तुम्ही', असे म्हणत त्यांनी हशा पिकवला. छायाचित्रकारांना "पुरे आता' म्हणत थांबविले. छोट्या राज्यात कसा मोठा भ्रष्टाचार होतो, त्याचे उदाहरण मधू कोडाच्या रूपातून पाहा, असे सांगून लगेच "हा विनोद होता' अशी पुष्टीही जोडली. बाळासाहेबांचे उत्तर मी कसे देणार, असा प्रतिप्रश्‍न एका प्रश्‍नाच्या उत्तरादाखल त्यांनी केला. "तुम्हाला धमकी आहे. त्यासाठी बिहारमधून पाच जण आलेत. याबाबत काय,' या प्रश्‍नावर त्यांनी "आता धमकीच्या निमित्तानेही "ते' महाराष्ट्रात येत आहेत' असे म्हणत खसखस पिकवली. हे लिहू नका, असे सांगतानाच त्यांनी "मीडियाला सल्ला दिला म्हणून चौकट छापू नका', अशीही कोटी केली.
विदर्भाचा विकास झाला नसल्याचे मान्य आहे. मात्र, त्याच्या विकासासाठी राज्याचे विभाजन पर्याय ठरू शकत नाही. मेंदूला रक्तस्त्राव होत नाही म्हणून, डॉक्‍टर बदलणे समजण्यासारखे आहे. मात्र, मुंडकेच छाटणे हा उपचार कसा ठरू शकतो?
- राज ठाकरे.

राज ठाकरेंचे विदर्भात उत्साहात स्वागत

सकाळ वृत्तसेवा
Tuesday, December 15, 2009 AT 02:25 AM (IST)


नागपूर - महाराष्ट्र नवनिर्माण सेनेचे अध्यक्ष राज ठाकरे यांचे आज सकाळी नागपुरात आगमन झाले. त्यांच्या स्वागतासाठी समर्थकांनी विमानतळावर प्रचंड गर्दी केली. दिवसभर ते सामाजिक, साहित्यिक आणि सांस्कृतिक क्षेत्रातील मान्यवरांशी चर्चा करणार आहेत. स्वतंत्र विदर्भ राज्य निर्मितीच्या प्रश्‍नावर ते काय भूमिका घेतात याकडे सगळ्यांचे लक्ष लागले आहे.

राज ठाकरे आज सकाळी आठ वाजता, शहरात येणार होते. त्यांच्या विमानास तब्बल तासभर उशीर झाला. तोवर मनसेचे कार्यकर्ते मोठ्या प्रमाणात विमानतळावर जमले होते. घोषणाबाजी करीत होते. राज ठाकरेंचे आगमन होताच, ढोलताशांच्या गजरात, फटाके फोडून कार्यकर्त्यांनी आनंद व्यक्त केला. त्यांना भेटण्यासाठी कार्यकर्ते आणि त्यांचे छायाचित्र घेण्यासाठी माध्यमांचे प्रतिनिधी समोर सरकले. तोवर सीआयएसएफच्या जवानांनी त्यांना कडे केले. " येणाऱ्या प्रत्येकांना मला भेटू द्या' असा आग्रह राज ठाकरे धरत होते. कार्यकर्ते मोठ्या संख्येने त्यांना फुले, पुष्पगुच्छ देण्याचा प्रयत्न करीत होते. पोलिस त्यांना ढकलत होते. हा प्रकार बघून प्रशांत पवार पोलिसांवर आक्षरशः धावून गेले. त्यांची पोलिसांशी झटापट झाली. त्यांच्या डोळ्याला इजा झाली.

तर "वर्ल्ड कप 2011' प्रदर्शित होऊ देणार नाही

सकाळ वृत्तसेवा
Tuesday, December 15, 2009 AT 12:15 AM (IST)

संतोष भिंगार्डे : सकाळ वृत्तसेवा
मुंबई - महाराष्ट्र नवनिर्माण सेनेची नेमकी कोणती बाजू किंवा आंदोलने "वर्ल्ड कप 2011'मध्ये दाखविली आहेत, हे आम्हाला माहीत नाही. त्यामुळे आम्हाला हा चित्रपट पाहायचा आहे. त्यामध्ये आमच्याविरोधात काही आढळले, तर आम्ही हा चित्रपट महाराष्ट्रात प्रदर्शित होऊ देणार नाही, असा इशारा मनसेच्या सिने वर्कर्स असोसिएशनचे अध्यक्ष अमेय खोपकर यांनी दिला आहे.

रवी कपूरने दिग्दर्शित केलेला "वर्ल्ड कप 2011' हा चित्रपट प्रदर्शनापूर्वीच वादाच्या भोवऱ्यात सापडला आहे. प्रसिद्ध दिग्दर्शक महेश भट यांच्यावर रवी पुजारीने गोळीबार का केला, हे या चित्रपटात दाखविण्यात आले आहे. त्यामुळे रवी पुजारीने अभिनेता व दिग्दर्शक रवी कपूरला जीवे मारण्याची धमकी दिली आहे. त्याला पोलिस संरक्षण देण्यात आले आहे. आता या चित्रपटाबाबत आणखी एक वाद उफाळून येण्याची दाट शक्‍यता आहे. या चित्रपटात मनसेची आंदोलने दाखविण्यात आली आहेत.

"महाराष्ट्र नवनिर्माण सेनेची आंदोलने प्रथमच रुपेरी पडद्यावर' अशा प्रकारची बातमी "सकाळ'ने याआधीच प्रसिद्ध केली आहे; मात्र ही आंदोलने कशा पद्धतीने किंवा कशासाठी दाखविण्यात आली आहेत, हे अद्याप स्पष्ट झालेले नसले तरी यावरून आता मोठा संघर्ष होण्याची शक्‍यता आहे. याबाबत मनसेच्या सिने वर्कर्स असोसिएशनचे अध्यक्ष अमेय खोपकर म्हणाले, ""हा चित्रपट आमच्याविरोधात आहे, असे आम्ही ऐकले आहे. टीव्हीवरील प्रोमोज, तसेच चित्रपटसृष्टीतील काही जाणकारांनी आम्हाला ही माहिती दिली आहे. त्यामुळे हा चित्रपट आम्हाला आता पाहायचा आहे. चित्रपटात महाराष्ट्र नवनिर्माण सेनेवर काही भलतेसलते आरोप केलेले असतील किंवा आमच्या आंदोलनांबाबत काही वेगळेच भाष्य केलेले असेल, तर आम्ही त्याची गंभीर दखल घेणार आहोत. हा चित्रपट महाराष्ट्रात कोणत्याही परिस्थितीत प्रदर्शित होऊ देणार नाही.''

दिग्दर्शक रवी कपूर यांच्याशी संपर्क साधला असता, ते म्हणाले, ""आम्ही त्यांना चित्रपट दाखविण्यास तयार आहोत. ते आमचे राजा आहेत आणि प्रजा कधीही राजाला दुखवीत नसते. त्यांना कुणी तरी चुकीची माहिती दिली आहे.''