आमदार जाधव यांना मारहाण करणाऱ्या पोलिसांवर कारवाईची मागणी

औरंगाबाद, ६ जानेवारी/खास प्रतिनिधी कन्नडचे मनसेचे आमदार हर्षवर्धन जाधव यांना पोलीस अधिकाऱ्यांनी गुंडासारखी मारहाण केली आहे. दंडुकशाही दाखविणाऱ्या पोलीस अधिकारी व कर्मचाऱ्यांवर कारवाई करा, अशी मागणी मनसेचे गटनेते आमदार बाळ नांदगावकर यांनी मुख्यमंत्री पृथ्वीराज चव्हाण यांच्याकडे केली आहे. बुधवारी हर्षवर्धन जाधव यांना मारहाण करण्यात आली होती. या पाश्र्वभूमीवर मनसेचे शिष्टमंडळ गुरुवारी सकाळी मुख्यमंत्री पृथ्वीराज चव्हाण यांना सुभेदारी विश्रामगृहावर भेटले. या शिष्टमंडळात आमदार नितीन सरदेसाई, मराठवाडा संपर्क नेते अतुल सरपोतदार, जिल्हाध्यक्ष भास्कर गाडेकर, डॉ. सुनील शिंदे, सुमीत खांबेकर आदी उपस्थित होते. मनसेच्या शिष्टमंडळाने औरंगाबादचे ग्रामीण पोलीस अधीक्षक मनोज लोहिया यांचीही भेट घेतली. या प्रकरणाची चौकशी करण्यात येईल, असे आश्वासन मनोज लोहिया यांनी या शिष्टमंडळाला दिले आहे. हर्षवर्धन जाधव यांना खुलताबाद येथे पोलीस उपनिरीक्षक एस. डी. कोकणे यांच्यासह ४० ते ५० पोलीस कर्मचाऱ्यांनी बेदम मारहाण केली. या मारहाणीमुळे हर्षवर्धन जाधव यांना नीट उभे राहून चालताही येत नव्हते. आमदारांना झालेली मारहाण निषेधार्ह असल्याचे बाळ नांदगावकर म्हणाले. असा काय गुन्हा केला होता जेणेकरून या पोलीस अधिकाऱ्यांनी आमदार जाधव यांना गुंडासारखी मारहाण केली. मुख्यमंत्री चव्हाण हे संवेदनशील आहेत. ते नक्की या प्रकरणात न्याय देतील, अशी अपेक्षा व्यक्त करण्यात आली. मुख्यमंत्र्यांना या मारहाणीचे छायाचित्रे दाखविण्यात आली. त्या वेळी मुख्यमंत्र्यांनी या प्रकरणात पोलिसांनी ‘थर्ड डिग्री’चा वापर केला आहे असे म्हटल्याचे नांदगावकर यांनी सांगितले. २००९ मध्ये कन्नडमध्ये अवैध वाहतूक, मटका या विरोधात आमदार हर्षवर्धन जाधव यांनी आवाज उठविला होता. त्या वेळी पोलीस उपनिरीक्षक एस. डी. कोकणे हे कन्नडमध्ये कार्यरत होते. याचा राग म्हणून त्यांनी आमदार जाधव यांना मारहाण करून वचपा काढला, असा आरोपही बाळ नांदगावकर यांनी केला. मनसेचे अध्यक्ष राज ठाकरे यांनी त्या वेळी कन्नडच्या या पोलीस उपनिरीक्षकांची बदली करा म्हणून तत्कालीन गृहमंत्री आर. आर. पाटील यांच्याकडे तक्रारही केली होती. आमदार जाधव यांची काय चूक होती. शेतकऱ्यांच्या प्रश्नावर ते मुख्यमंत्र्यांना भेटायला चालले होते. तरीही पोलिसांनी दंडुकशाहीचा अवलंब करून आमदार जाधव यांना बेदम मारहाण केली, असे बाळ नांदगावकर म्हणाले. राज्याचे गृहमंत्री आर. आर. पाटील यांच्यावर आमचा विश्वास नाही. ते त्यांच्या दलातील कर्मचारी व अधिकाऱ्यांवर कारवाई करतील अशी त्यांच्याकडून आमची अपेक्षा नाही; त्यामुळेच संवेदनशील असलेल्या मुख्यमंत्र्यांकडे आम्ही दाद मागितली आहे. या प्रश्नावर विधानसभेतही आवाज उठविला जाईल. पोलीस कर्मचारी व अधिकाऱ्यांवर निलंबनाची कारवाई करण्यात यावी अशी मागणी मनसेच्या वतीने करण्यात आली आहे. वेळ पडली तर न्यायालयातही धाव घेऊ तसेच मानव अधिकार आयोगाकडे दाद मागू, असेही मनसेच्या नेत्यांनी सांगितले. सध्या आमदार हर्षवर्धन जाधव हे येथील खासगी इस्पितळात उपचार घेत आहेत. त्यांचे सासरे आणि जालन्याचे भारतीय जनता पक्षाचे खासदार रावसाहेब दानवे यांनी रुग्णालयात जाऊन जाधव यांच्या प्रकृतीची विचापूस केली.

शिवसेनेची मनसेला ऑफर?

शिवसेनेची मनसेला ऑफर?

Wednesday, January 05, 2011 AT 12:00 AM (IST)


डोंबिवली - कल्याण-डोंबिवली महापालिकेच्या स्थायी समिती सभापती पदाची निवडणूक 7 जानेवारी रोजी होत असून मनसेने पहिले अध्यक्षपद घ्यावे, यासाठी शिवसेनेकडून त्यांना ऑफर देण्यात येत आहे. मात्र, अध्यक्षपद स्वीकारावे किंवा नाही, याबाबत एकमत होत नसल्याने मनसेच्या पदाधिकाऱ्यांची द्विधा मनःस्थिती झाली आहे. स्थायी समिती सभापती पदावरून पुन्हा एकदा राजकारण ढवळून निघण्याची चिन्हे आहेत.

पालिकेच्या पहिल्या महासभेत स्थायी समिती सदस्यांची निवड झाली असली, तरी स्थायी समिती सभापतींची निवड अजून बाकी आहे. ही निवड आता 7 जानेवारी रोजी होणार आहे. शिवसेनेतर्फे जनार्दन म्हात्रे यांचे नाव चर्चेत असून मनसेकडून सुदेश चुडनाईक यांचे नाव पुढे आले आहे. मात्र, मनसेने अध्यक्षपद स्वीकारावे असा आग्रह शिवसेना पदाधिकाऱ्यांकडून होत असून शिवसेनेचे काही कार्यकर्ते याला दुजोरा देत आहेत. मात्र, पक्षश्रेष्ठींनी सर्वच बाबतींत तटस्थ राहण्याचे आदेश दिल्यामुळे मनसेच्या पदाधिकाऱ्यांची चांगलीच अडचण झाली आहे. दुसरीकडे आपल्याशिवाय दुसऱ्या कोणालाही अध्यक्षपद मिळू नये यासाठीच शिवसेनेकडून शॉर्ट नोटीस देण्यात आली असल्याची चर्चा सुरू आहे.

शिवसेनेच्या नेत्यांनी आणि पदाधिकाऱ्यांनी मनसेला अडचणीत आणण्यासाठीच त्यांना स्थायी समितीच्या अध्यक्षपदाचे गाजर दाखविण्याचा प्रयत्न चालविला असल्याचे बोलले जात आहे. मनसेला सत्तेत सामावून घेतल्यास शिवसेनेला फायदा होणार असला, तरी पूर्ण सत्ता आल्याशिवाय सत्ता स्वीकारायची नाही, असे आदेश मनसे अध्यक्ष राज ठाकरे यांनीच दिले आहेत. एकीकडे समोरून आलेली सत्ता आणि दुसरीकडे पक्षादेश या कात्रीत मनसे पदाधिकारी सापडले आहेत. यावर अंतिम निर्णय पक्षश्रेष्ठींचाच असणार आहे. यामुळे मनसे शिवसेनेच्या या डावात फसेल, असे चित्र सध्या तरी दिसत नाही.
याबाबत मनसेचे आमदार रमेश पाटील यांच्याशी संपर्क साधला असता त्यांनी, काहीही घडू शकते असे संकेत दिले. मात्र, शिवसेना नेत्यांनी कोणत्याही परिस्थितीत अध्यक्ष आपलाच होणार असल्याचे सांगितले आहे.

अध्यक्षपदासाठी कॉंग्रेस आघाडीकडून विश्‍वनाथ राणे व भरत पाटील यांची नावे चर्चेत असल्याची माहिती खास सूत्रांनी दिली

परप्रांतीयांना जमिनी देऊ नका

परप्रांतीयांना जमिनी देऊ नका

सकाळ वृत्तसेवा

Wednesday, January 05, 2011 AT 12:00 AM (IST)

मुंबई - मुंबईसारख्या परिसरातील अधिकाधिक जागा मराठी उद्योजकांनी खरेदी केल्या पाहिजेत, असा आग्रह करतानाच या जमिनी परप्रांतीयांच्या ताब्यात जाण्यापासून वाचवल्या पाहिजेत, असे प्रतिपादन महाराष्ट्र नवनिर्माण सेनेचे अध्यक्ष राज ठाकरे यांनी येथे केले.

व्यापारी मित्र मंडळाच्या 30 व्या वर्धापन दिनानिमित्त ठाकरे बोलत होते. या वेळी मित्र मंडळाचे अध्यक्ष ज्योतिर्भास्कर जयंतराव साळगावकर, मंडळाचे उपाध्यक्ष व सारस्वत बॅंकेचे उपाध्यक्ष किशोर रांगणेकर, कार्यवाह किशोर साठे, कार्याध्यक्ष अनंत भालेकर, मुंबई व्यापारी सहकारी पतपेढीचे अध्यक्ष दीपक बापट, सहकार्यवाह मकरंद चुरी, खजिनदार प्रभाकर शिलधनकर आदी उपस्थित होते.

राज ठाकरे यांनी या वेळी राज्य सरकारवरही शाब्दिक हल्ला चढवला. ते म्हणाले, की सागरी नियंत्रण कायदा (सीआरझेड) लावून येथील शासन समुद्रसपाटीजवळील जमिनी अल्प दरात खरेदी करते. सर्व जमिनी विकत घेऊन झाल्यावर सीआरझेड कायदा रद्द करते आणि त्याचा अधिकाधिक मोबदला मिळविण्याचा प्रयत्न करते. राज्य सरकारचा हा डाव विशेषत: मराठी उद्योजकांच्याही ध्यानी यायला हवा. कोकण किनारपट्टीवरील जमिनी या कोणामार्फत विकत घेतल्या जात आहेत, याचाही अभ्यास करायला पाहिजे, असे आवाहनही ठाकरे यांनी उपस्थित मराठी उद्योजकांना दिले.

या वेळी मित्र मंडळातर्फे यशस्वी मराठी उद्योजक म्हणून मनोहरशेठ रेडीज, देवेंद्र बापट, शंकरराव बोरकर यांचा मराठी उद्योगभूषण म्हणून सत्कार करण्यात आला. कला क्षेत्रातील मराठी कार्याबद्दल सुहास भालेकर यांचा; तर क्रीडा क्षेत्रातील नवतारका कबड्डीपटू स्नेहल साळुंखे यांचाही या वेळी सत्कार करण्यात आला. "आस्वाद हॉटेल'चे मालक श्रीकृष्ण सरजोशी यांच्या व्यवसाय कारकिर्दीला 25 वर्षे पूर्ण झाल्याबद्दल त्यांचा विशेष गौरव करण्यात आला.
कार्यक्रमास या वेळी "केसरी टूर्स'चे केसरीनाथ पाटील, मंडळाच्या सल्लागार अचला जोशी, "समर्थ ग्रुप'चे विलास गावकर, कार्यकारिणीचे सदस्य विजय कामेरकर, सहकार्यवाह किरण शेट्ये आदीही उपस्थित होते

वाढदिवसाचे होर्डिंग लावू नयेत - राज ठाकरे

वाढदिवसाचे होर्डिंग लावू नयेत - राज ठाकरे

सकाळ वृत्तसेवा

Saturday, January 01, 2011 AT 12:30 AM (IST)

मुंबई - महाराष्ट्र नवनिर्माण सेनेचे अध्यक्ष राज ठाकरे यांनी 2011 या नवीन वर्षासाठी नवा संकल्प सोडला आहे. मनसेच्या कोणत्याही कार्यकर्त्याने स्वतःच्या वाढदिवसाचे होर्डिंग, बॅनर कुठेही लावू नयेत; अन्यथा त्याच्याविरुद्ध पक्षांतर्गत कारवाई करण्यात येईल. आपल्याही वाढदिवसाचे एकही होर्डिंग कुणी लावू नये, असे आदेश मनसे अध्यक्ष राज ठाकरे यांनी आज दिले.

नवीन वर्षाचा नवा संकल्प मांडताना राज यांनी होर्डिंगबाबत सूचना केल्या आहेत. मनसेच्या वरपासून खालपर्यंतच्या सर्व कार्यकर्त्यांसाठी आपल्या सहीचे पत्र दोन-तीन दिवसांत मिळेलच. शहराचे विद्रुपीकरण वाढत चालत आहे. रस्त्यात जागाजोगी होर्डिंगबाजी दिसून येते. शहराला होर्डिंगपासून वाचविण्यासाठी हा आपला नवा संकल्प आहे, याची प्रत्येकाने काटेकोरपणे अंमलबजावणी केली पाहिजे, असे त्यांनी म्हटले आहे. वाढदिवसाची होर्डिंग चुकूनही लागता कामा नयेत, असे स्पष्ट करतानाच राज म्हणाले, की माहीत नव्हते, विसरलो, अशा फुटकळ सबबी आपण ऐकून घेणार नाही. एखाद्या समाजोपयोगी घटनेचे वा उपक्रमांचे होर्डिंग फक्त एकच दिवस लावता येईल; मात्र तो दिवस झाल्यानंतर तातडीने ज्यांनी हे होर्डिंग वा बॅनर लावला आहे, त्याने तो उतरविला पाहिजे. शहर स्वच्छ ठेवणे हे प्रत्येकाचे काम आहे. त्यामुळे मनसेच्या प्रत्येक कार्यकर्त्याने स्वच्छतेचे आपले कर्तव्य पार पाडले पाहिजे, असेही त्यांनी स्पष्ट केले.
समाजोपयोगी व एखाद्या उपक्रमाचे होर्डिंग लावताना विविध ठिकाणी उभारण्यात येणाऱ्या महापुरुांचे पुतळे अथवा फोटोंआड कुठलेही होर्डिंग येणार नाही याची दक्षता घ्या, शहरात कुठेही बकालपणा करू नका, अशा सूचना देताना राज म्हणाले, की शाळा, रुग्णालये, ट्रॅफिक सिग्नल अशा ठिकाणी मनसेचे एकही होर्डिंग वा बॅनर लागता कामा नये. एवढे सांगूनही जर कोणी असा पराक्रम केला, तर त्याच्यावर पक्षातंर्गत कठोर कारवाई केली जाईल.

दादोजींच्या पुतळ्यावरून राजकारण - राज

दादोजींच्या पुतळ्यावरून राजकारण - राज

सकाळ वृत्तसेवा

Monday, December 27, 2010 AT 03:39 PM (IST)

 

मुंबई - लाल महाल परिसरातील दादोजी कोंडदेव यांचा पुतळा हलविणे हे इतर महत्त्वाच्या विषयांना बगल देण्यासाठी सत्ताधाऱ्यांकडून करण्यात आलेले राजकारण आहे, असे मत महाराष्ट्र नवनिर्माण सेनेचे अध्यक्ष राज ठाकरे यांनी आज (सोमवार) पत्रकार परिषदेत व्यक्त केले.

आज पहाटे दोनच्या सुमारास लाल महाल परिसरात समुह शिल्पात असलेला दादोजी कोंडदेव यांचा पुतळा महापालिकेने काढला. याबाबत राज ठाकरे म्हणाले, ''सत्ताधाऱ्यांनी नाकर्तेपणा झाकण्यासाठी सत्ताधाऱ्यांकडून दादोजी कोंडदेव यांचा पुतळा हलविण्याचे राजकारण करण्यात येत आहे. लाल महालामध्ये दादोजींसोबत शहाजीराजेंचाही पुतळा बसवायला हवा होता. या प्रकरणी गरज पडल्यास मनसे आंदोलन करेल.''

भारतकुमार राऊत-राजच्या मैत्रीने उद्धव नाराज

भारतकुमार राऊत-राजच्या मैत्रीने उद्धव नाराज

सकाळ वृत्तसेवा

Monday, December 27, 2010 AT 12:15 AM (IST)

 

मुंबई - महाराष्ट्र नवनिर्माण सेनेचे अध्यक्ष राज ठाकरे यांच्या भाजप कार्यालयातील भेटीमुळे युतीमध्ये निर्माण झालेला तणाव निवळला असला, तरीही शिवसेनेचे खासदार भारतकुमार राऊत यांनी थेट राज यांना दिलेल्या निमंत्रणानुसार ते त्यांच्या पुत्राच्या विवाह सोहळ्यास उपस्थित राहिले. या सर्व प्रकारामुळे शिवसेनेचे कार्याध्यक्ष उद्धव ठाकरे संतप्त झाले असून भारतकुमार व राज यांच्या पडद्यामागील मैत्रीचा निषेध म्हणून ते शनिवारी राऊत यांच्या पुत्राच्या विवाह सोहळ्यास अनुपस्थित राहिल्याचे समजते.

राज यांनी गेल्या आठवड्यात भाजप कार्यालयाला दिलेल्या भेटीमुळे युतीत तणाव निर्माण झाला होता. भाजचे नेते गोपीनाथ मुंडे यांच्या मध्यस्थीने हा तणाव निवळला; मित्रपक्ष भाजपच्या हरकतींवरून नाराज झालेल्या उद्धव यांनी आपली नाराजी जाहीरपणे बालून दाखविली; पण भारतकुमार यांनी आपल्या मुलाच्या विवाहाचे निमंत्रण थेट राज यांना दिल्याचा मुद्दा पुढे आणत भाजपच्या काही पदाधिकाऱ्यांनी उद्धव यांनाच कोंडीत पकडण्याचा प्रयत्न केला. राज भाजप कार्यालयात आलेले तुम्हाला चालत नाहीत; पण तुमच्या खासदारांनी त्यांना भेटून निमंत्रण दिलेले कसे चालते, असा सवालही भाजपच्या गोटातून उपस्थित करण्यात आला. राजकारणात शिवसेना व मनसे समोरासमोर उभी ठाकली असतानाच आपल्या खासदारांचे हे "मैत्री'पूर्ण वर्तन उद्धव यांना रुचले नाही. आपण समोरासमोर टीका करायची व पुन्हा शिवसेनेचे काही नेते आपल्या जुन्या मैत्रीचे हवाले देणार, या दुटप्पीपणामुळे उद्धव नाराज झाल्याचे समजते. कल्याण-डोंबिवली महापालिका निवडणुकीच्या रिंगणात शिवसेनाप्रमुख बाळासाहेब ठाकरे यांच्याविरुद्ध राज यांनी टीका केली होती. "एलआयसी'मध्ये शिवसेनेला टक्कर देण्यासाठी मनसेने युनियन स्थापन करायची, हे दाखले ताजे असतानाच शिवसेनेचे खासदार जुन्या मैत्रीचे हवाले देतात, हा प्रकार त्यांना रुचला नाही. सध्या राजकारणाच्या प्रत्येक वाटेवर शिवसेना व मनसेमध्ये जाहीर संघर्ष सुरू आहे. विशेष म्हणजे मुंबई विद्यापीठाच्या सिनेट निवडणुकीच्या महायुद्धात भारतीय विद्यार्थी सेना व मनविसे समोरासमोर उभी ठाकली असतानाच, शिवसेनेच्या खासदाराच्या पुत्राच्या विवाह सोहळ्यास मनसे अध्यक्षांच्या उपस्थितीमुळे कार्यकर्त्यांमध्ये नेमका कुठला संदेश जाणार, याकडेही शिवसेनेच्या ज्येष्ठ नेत्याने लक्ष वेधले आहे.

राज या सोहळ्यास उपस्थित राहिले होते. म्हणूनच उद्धव "बीकेसी' येथे झालेल्या विवाह सोहळ्यास गेले नाहीत. त्यांच्या भूमिकेचे शिवसेनेतून स्वागत होत असून पडद्यामागून मनसेच्या पदाधिकाऱ्यांशी मैत्री ठेवणाऱ्या शिवसेनेच्या काही पदाधिकाऱ्यांना यामुळे चांगलीच चपराक मिळेल, अशी प्रतिक्रिया काही पदाधिकाऱ्यांनी व्यक्त केली.

मनसेशी युतीबाबत भाजपची चाचपणी

मनसेशी युतीबाबत भाजपची चाचपणी

सकाळ वृत्तसेवा

Tuesday, December 21, 2010 AT 12:34 AM (IST)

उमाकांत देशपांडे
मुंबई - शिवसेनेशी ताणले गेलेले संबंध आणि आगामी महापालिका निवडणुका लक्षात घेऊन शिवसेनेला इशारा देण्यासाठी राज ठाकरे यांची भाजप प्रदेश कार्यालय भेट घडवून आणली गेली. युतीबाबत चर्चा झाली नसली तरी, आगामी काळात तशी चाचपणी होणार असल्याचे वरिष्ठ भाजप नेत्यांनी सूचित केले. 

मनसेशी युती करावी, असा भाजपमध्ये जोरदार मतप्रवाह असून, मनसेशी सलगी करण्यासाठी भाजपच्या केंद्रीय नेतृत्वानेही प्रदेश नेत्यांना हिरवा कंदील दाखविला असल्याचे समजते.

राज ठाकरे अचानकपणे भाजप प्रदेश कार्यालयात गेले आणि राजकीय चर्चेला सुरवात झाली आहे. ही राजकीय भेट नव्हती, असे स्पष्टीकरण भाजप प्रदेशाध्यक्षांनी केले असले, तरी राजकारणात सहज किंवा योगायोगाने असे काही घडत नाही. त्यामुळे अशा भेटीत राजकीय चर्चा किंवा समीकरणे जुळत नसली तरी त्यासाठी पोषक वातावरण तयार करणे किंवा शिवसेनेला इशारा देण्यासाठी या भेटीचे नियोजन झाले. भाजपचे महाराष्ट्राचे प्रभारी व्यंकय्या नायडू यांच्या उपस्थितीत पक्षाच्या कार्यकारिणीची बैठक काल पार पडली. त्यामध्ये एकनाथ खडसेंसह अन्य वरिष्ठ नेत्यांनी शिवसेनेविरुद्ध नाराजी व्यक्त केली. खडसेंनी तर विधान परिषद निवडणुकीआधी शिवसेनेला उघडपणेच मुंबई महापालिका निवडणुकीत युती तोडण्याचा इशारा दिला होता. खडसेंच्या मुलाचा विधान परिषद निवडणुकीत पराभव करण्यासाठी शिवसेना नेत्यांनी मदत केली. कल्याण-डोंबिवली महापालिका निवडणुकीत शिवसेनेच्या बंडखोरांना थंड करण्यात आले नाही व भाजपला त्याची किंमत चुकवावी लागली. केंद्रीय अध्यक्ष नितीन गडकरी राज्यात प्रदेशाध्यक्ष असताना त्यांनी मनसेशी युती करण्यासाठी काही पावलेही टाकली होती; पण ज्येष्ठ नेते लालकृष्ण अडवानी व अन्य नेत्यांनी शिवसेनेशी युती तोडू नये, अशी भूमिका घेतल्याने मनसेशी युती साध्य होऊ शकली नव्हती.

मुंबई महापालिका निवडणुकीतही शिवसेनेचेच वर्चस्व राहणार असून, त्यामागे भाजपची फरपट होऊ नये, असे भाजप नेत्यांचे मत आहे. शिवसेना पदरात टाकतील, तेवढ्या जागा भाजपने लढवायच्या, हे आता मान्य करू नये. एवढे वर्ष युती असली, तरी कधी ना कधी त्याचा विचार भाजपला करावाच लागेल. त्यामुळे महापालिका निवडणुकीआधी युतीबाबत भाजप निर्णय घेण्याच्या मनःस्थितीत आहे. व्यंकय्या नायडू यांच्या उपस्थितीत वरिष्ठ भाजप नेत्यांनी आपली भूमिका पक्षपातळीवर काल मांडली होती. त्याच वेळी राज ठाकरे प्रदेश कार्यालयासमोरील "एलआयसी'च्या योगक्षेम इमारतीत येणार असल्याचे भाजप नेत्यांना समजल्यावर हा योगायोग साधण्याचे भाजप नेत्यांनी ठरविले. त्यामुळे राज ठाकरे यांना चहापानाचे निमंत्रण देण्यात आले व त्यांनी स्वीकारले. त्यामुळे मनसेशी सलोख्याचे संबंध प्रस्थापित करण्यासाठी भाजपने एक पाऊल पुढे टाकले आहे. त्याचे युतीमध्ये रूपांतर कधी होणार, याबाबत राजकीय क्षेत्रात तर्कवितर्क लढविण्यास सुरवात झाली आहे.