...तर मनसे सुरक्षा देईल

मुंबई- डोंबिवलीत निर्माण झालेल्या फेरीवाल्यांच्या समस्येवर शिवसेना आक्रमक झाल्यानंतर मनसेनेही मुंबईत हा मुद्दा उचलून धरला आहे. फेरीवाल्यांवर कारवाई करण्यास टाळाटाळ करणाऱ्या अधिकाऱ्यांनाच मनसेच्या माजी नगरसेवकांनी घेराव घालत ही कारवाई त्वरित आणि कडक करावी अशी मागणी केली आहे. परंतु जर पोलीस संरक्षणाच्या नावाखाली ही कारवाई करता येत नसेल तर, मनसैनिक महापालिकेच्या कर्मचारी आणि अधिकाऱ्यांच्या सुरक्षेसाठी तैनात राहील, महापालिकेच्या कर्मचाऱ्यांच्या सुरक्षेची जबाबदारी मनसे घेईल, असा शब्द माजी नगरसेवकांनी दिला आहे.
दादर-माहीममधील नागरिकांना होत असलेल्या फेरीवाल्यांच्या अतिक्रमणाचा त्रास लक्षात घेत मनसेच्या माजी नगरसेवकांनी महापालिका उपायुक्त आनंद वाग्राळकर यांना गुरुवारी सकाळी घेराव घातला. एफ दक्षिण विभागाच्या कार्यालयाबाहेर हा प्रकार घडला. आनंद वाग्राळकर हे कधीही सामान्य नागरिकांना भेटत नाहीत. तसेच या विभागातील फेरीवाल्यांवरही ते कडक कारवाई करत नाहीत, असा आरोप करत उपयुक्तांना धडा शिकवण्यासाठी मनसेचे माजी नगरसेवक संतोष धुरी, सुधीर जाधव आणि विरेंद्र तांडेल यांच्यासह माजी नगरसेवक आणि पदाधिकारी आनंद वाग्राळकर यांना भेटण्यास गेले होते. यावेळी त्यांनी आनंद वाग्राळकर यांना घेराव घातला. वाग्राळकर यांनी आवश्यक सुरक्षा यंत्रणा उपलब्ध झाल्यानंतर पुढच्या आठवड्यात धडक कारवाई केली जाईल असे आश्वासन मनसेच्या माजी नगरसेवकांच्या शिष्टमंडळाला दिले.
मात्र ही कारवाई न झाल्यास मनसे स्टाईलने आंदोलन केले जाईल असा इशारा या माजी नगरसेवकांनी दिला. महापालिकेकडे अधिकाऱ्यांसाठी सुरक्षा यंत्रणा नसल्यास मनसेच्या वतीने ती उपलब्ध करून देण्याची तयारीही धुरी यांनी दर्शवली.

रामदेवबाबा राज ठाकरेंच्या भेटीला; अमितला योगाचे धडे

मुंबई - योगगुरू रामदेवबाबा यांनी आज (बुधवार) सकाळी महाराष्ट्र नवनिर्माण सेनेचे (मनसे) अध्यक्ष राज ठाकरे यांची सदिच्छा भेट घेतली.
राज ठाकरे यांच्या कृष्णकुंज या निवासस्थानी ही भेट झाली. या भेटीचे नेमके कारण कळू शकले नसले तरी भेट वैयक्तिक असल्याचे सांगण्यात येत आहे. असे असले तरी रामदेवबाबांच्या या अचानक भेटीमुळे राजकीय वर्तुळात तर्कवितर्कांना उधाण आले आहे. रामदेवबाबांनी मुख्यमंत्री देवेंद्र फडणवीस यांचीही भेट घेतली आहे.
पतंजली या आपल्या ब्रँडमुळे नावारूपाला आलेले योगगुरू रामदेवबाबा यांनी राज ठाकरे यांचे सुपुत्र अमित ठाकरे यांना ते योगाचे धडे देणार असल्याची माहिती सूत्रांकडून मिळाली आहे.
अमित ठाकरे हे आजाराने त्रस्त आहेत. त्यामुळे राज ठाकरे देखील पक्ष पातळीवर जास्त कार्यरत नव्हते. तसेच उपचारासाठी राज अमितला घेऊन परदेशी गेले होते.

मराठी माणसाच्या न्याय हक्कासाठी 'ठाकरे' हवेच !

राजकारणात फार रोखठोक भूमिका घेऊन चालत नाही. थोडा थंडा करके खाओ ! असे बोलले जाते. शिवसेनाप्रमुख बाळासाहेब ठाकरे हे स्पष्ट आणि रोखठोक विचार मांडण्यासाठी प्रसिद्ध होते. 'पोटात एक आणि ओठात ऐक' हे त्यांना आयुष्यभर जमले नाही. जे नाही पटत ते बोलून मोकळे होत असत. परिणामाची चिंता ते कधी करीत बसले नाहीत. त्यांच्या ज्वलंत विचाराने राज्यात एक पिढी भारावून गेली. ते आज आपल्यात नसले तरी त्यांचे विचार कदापि पुसले जाणार नाहीत. प्र. के. अत्रे काय किंवा बाळासाहेब ठाकरे काय, त्यांची या ना त्या कारणाने आठवण होत असते. त्यांच्या लेखणीने आणि वाणीने अनेकांना घायाळ केले.

मराठी माणूस हा शिवसेनेचा आत्मा आहे हे बाळासाहेब अखेरपर्यंत सांगत राहिले. मराठी माणसाच्या मुद्यावर त्यांनी कदापी तडजोड केली नाही. हिंदुत्व वैगेरे नंतर आले. मराठी माणूस हीच शिवसेनेची ताकद होती आणि आज माहीत नाही. 

बाळासाहेबांच्या रोखठोकपणाची आज अचानक आठवण आली ती मनसेचे अध्यक्ष राज ठाकरे यांच्यामुळे. महापालिका निवडणुकीत मनसेने सपाटून मार खाल्यानंतर या पक्षाने मुंबईत चिंतन बैठक घेतली. या बैठकीत थोडी गरमागरम चर्चा झाल्याची वार्ता कानोकानी पसरली. पराजयाचे खापर नेत्यांनी राज यांच्यावर फोडल्याचे तर माझा विचार लोकांपर्यंत पोचविण्यात नेते अपुरे पडल्याचे राज यांचे म्हणणे होते. पराजयानंतर टीकेचे धनी प्रत्येक पक्षाला आणि नेत्याला व्हावे लागते. त्यामध्ये तसे काही नवीन नाही.
राजकारणाच्या रणांगणात उतरल्यानंतर कोणी एक जिंकणार आणि कोणी तरी पराभूत होणार हे आलेच. पराभव झाला म्हणून कोणी संपत नाही. तो फिनिक्‍स पक्षाप्रमाणे उसळी घेऊ शकतो. आपण इंदिरा गांधीचे नेहमीच याबाबतीत उदाहरण देत असतो. आणीबाणीत धूळदाण उडूनही त्या पुन्हा सत्तेवर आल्या. या रणरागिनीच्या मनात जिद्द आणि पराजय पचविण्याची हिंमत होती. इंदिरा गांधींचा आदर्श डोळ्यासमोर ठेवून पराजय पचविण्याची हिम्मत प्रत्येक नेत्याने ठेवली पाहिजे. 

देशात आज मोदींची लाट आहे. या लाटेविरोधात दोन हात पुढे करण्याची हिंमतही विरोधकांनी दाखवायला हवी. नुसतीच टीका करण्यापेक्षा जो नेता रस्त्यावर उतरेल. जो लढेल तोच हिरो होईल. मोदींविरोधात वातावरण निर्मिती करण्याची तयारी ठेवा. मात्र त्यासाठी आपण आणि आपले चारित्र्य स्वच्छ असायला हवे. सरकारने तुम्हाला ईडीची भीती दाखवता कामा नये. 'कर नाही तर डर कशाला' असे म्हणणारे नेते हवेत. मला वाटते ती हिम्मत पृथ्वीराज चव्हाण, राजू शेट्टी, राज ठाकरे, उद्धव ठाकरे, सुप्रिया सुळे यांच्यात नक्कीच आहे. स्पष्ट आणि स्वच्छ विचार न डगमगता मांडायला हवेत. भाजप काय पुढील शंभरवर्षे सत्तेवर राहण्यासाठी जन्माला आला आहे का ? याचा विचार करायला हवा. 

अंतर्गत राजकारण काही असो. त्यांच्यातील अंतर्गत वाद उफाळून आला आहे. नेते नाराज आहेत. पक्षाचे काय करायचे आणि कोणती भूमिका घ्यायची याचा निर्णय तो पक्ष घेईल.

राजगडावरील बैठकीत राज ठाकरे यांना त्यांच्या नेत्यांनी मराठीचा मुद्दा बाजूला ठेवून सर्वांनाच बरोबर घेण्याविषयी सांगितले. त्यावर राज यांनी मराठीचा मुद्दा अजिबात सोडणार नाही. लोकांनी मला मते दिली नाहीत तरी चालेल असे स्पष्टपणे सांगितले ही स्वागतार्ह बाब आहे. शेवटी कुठेतरी पक्षाची ध्येयधोरणे असतातच ना! मराठीचा मुद्दा घेऊन जो पक्ष जन्माला आला त्या मुद्यालाच तिलांजली कशी देऊन चालेल! मताच्या लाचारीसाठी तडजोड करण्याचे कारणच काय हा प्रश्‍न उतरतोच. आज जागतिकीकरणात मराठीचा मुद्दा चालणार नाही असे राजकीय तज्ज्ञांचे मत आहे.

मराठी माणसाच्या न्याय हक्कासाठी ज्या शिवसेनेचा जन्म झाला ती हिंदूत्वाकडे वळली. एकाचवेळी मराठी आणि हिंदूही अशी भूमिका घेऊन ती पुढे चालली आहे. पण मुंबई पालिकेच्या निवडणुकीत मराठी माणसं सोडली तर इतर प्रांतातील किती हिंदूंनी शिवसेनेला मते दिली हा ही संशोधनाचा भाग आहे. आज आपण काही म्हटले तरी अर्धीच मुंबई मराठी माणसाची आणि अर्धी परप्रांतीयांची आहे हे मान्य करावेच लागेल. मराठीचा मुद्दा सोडायचा नाही ही राज ठाकरे यांनी घेतलेली भूमिका योग्यच आहे. मराठी माणसाला कोणी तरी वाली हवाच. महाराष्ट्रात मराठी माणसाच्या न्याय हक्कासाठी 'ठाकरे' हवेच अशी प्रत्येक मराठी माणसाची भूमिका असायला हवी. मग तो पक्ष मनसे असेल की शिवसेना?

मनसेतील असंतोषाचा स्फोट?

मुंबई : तीन वर्षांपूर्वी झालेल्या लोकसभा निवडणुकीपासून सुरू झालेली महाराष्ट्र नवनिर्माण सेनेची पडझड अलीकडेच झालेल्या महापालिका निवडणुकीतही कायम राहिल्याने पक्षाच्या दुसऱ्या फळीतील नेत्यांनी पक्षाध्यक्ष राज ठाकरे यांच्या कार्यपद्धतीवर नाराजी व्यक्‍त केल्याचे सांगण्यात येते. 

2014 मध्ये झालेल्या लोकसभा आणि नंतरच्या विधानसभा निवडणुकीत मनसेची मोठ्या प्रमाणावर पडझड झाली. राज्यात अलीकडेच झालेल्या महापालिका, नगरपालिका, नगरपंचायती, जिल्हा परिषदा आणि पंचायत समित्यांच्या निवडणुकीतही मनसेची धुळदाण उडाली. या संदर्भात पक्षाध्यक्ष राज ठाकरे यांच्या 'कृष्णकुंज' निवासस्थानी गुरुवारी (ता.20) झालेल्या बैठकीत राज यांच्याच कार्यद्धतीवर दुसऱ्या फळीतील नेत्यांनी नाराजी व्यक्‍त केल्याची चर्चा आहे. 

पक्ष संघटना वाढवण्यासाठी राज घरातून बाहेर पडत नाहीत. पदाधिकाऱ्यांना कोणताही कार्यक्रम दिला जात नाही. शेतकऱ्यांच्या कर्जमुक्‍तीसाठी सत्तेतील शिवसेनेने राज्य सरकारला घाम फोडला असताना मनसेची भूमिका स्पष्ट करण्यात नेतृत्वाला अपयश आले, असे आरोप या नेत्यांनी केल्याची चर्चा आहे.

या संदर्भात माजी नगरसेवक संदीप देशपांडे यांनी आज ट्‌विट केले असून त्यांना पक्षातील अन्य नेते आणि पदाधिकाऱ्यांनी समर्थन दिल्याची चर्चा सोशल मीडियावर सुरू आहे. देशपांडे यांनी यापूर्वीही राज यांच्याकडे त्यांच्या कार्यपद्धीबाबत नाराजी व्यक्‍त केल्याचे सांगण्यात येते. 

मध्यंतरी शिवाजी पार्कवरील सेल्फी पॉईंटचा विषय गाजला होता. त्यामागे राज यांच्या वादग्रस्त कार्यपद्धतीची पार्श्‍वभूमी असल्याचे समजते. पक्षासाठी आपण काम करणार नसाल तर मीही करणार नाही, अशा शब्दांत नाराजी व्यक्‍त करून देशपांडे यांनी सेल्फी पॉईंट रद्द केला होता. त्यानंतर तो सुरू करण्यासाठी भाजपसह शिवसेनेतही चढाओढ सुरू होती. 

मनसेने केलेली नाशिकमधील विकासकामे, तसेच अन्य ठिकाणच्या कामांना भेट देण्यासाठी राज ठाकरे मराठी फिल्म इंडस्ट्रीतील मान्यवरांना सोबत घेऊन फिरत असल्याची बाबही मनसे नेत्यांना खटकली असल्याची चर्चा दुसऱ्या फळीत सुरू असल्याचे सांगण्यात येते.

तुम्ही माझी भूमिका लोकांपर्यंत पोचवण्यात कमी पडलात - राज ठाकरे

मुंबई - महापालिका निवडणुकींचा माहोल पार पाडल्यानंतर सुमारे दोन महिन्यांनंतर महाराष्ट्र नवनिर्माण सेनेने पराभवाचे, चुकांचे चिंतन करण्यासाठी बैठक पार पडली. यामध्ये मनसे अध्यक्ष राज ठाकरे यांनी पदाधिकाऱ्यांना खडेबोल सुनावले.

मी मांडलेली भूमिका लोकांपर्यंत पोचविण्यात तुम्ही कमी पडलात, असा ठपका राज ठाकरे यांच्याकडून पदाधिकाऱ्यांवर ठेवण्यात आल्याचे कळते, तर उमेदवार निवडीच्या प्रक्रियेबाबत पदाधिकाऱ्यांनी आक्षेप नोंदविल्याचे कळते. राज ठाकरे यांच्या "कृष्णकुंज' या निवासस्थानी गुरुवारी पक्षाचे नेते, सरचिटणीस यांची बैठक बोलवण्यात आली होती. सुमारे दोन तास ही बैठक चालली. महापालिकेतल्या पराभवाबाबत नेते, सरचिटणीस यांनी पहिल्यांदाच राज यांच्यासमोर त्यांची परखड मते मांडल्याचे कळते. या वेळी पदाधिकाऱ्यांनी विविध विषयांवर तुमच्याकडून पक्षाची भूमिकाच येत नाही, असे मत मांडल्याचे कळते.

त्यावर राज ठाकरे यांनी मी भूमिका मांडतो; पण तुम्हीच माझ्या भूमिका लोकांपर्यंत पोचवायला कमी पडत आहात, असे सांगितल्याचे कळते. पक्षाच्या कार्यकर्त्यांची आता भावना आहे, आता आपण मराठीप्रमाणेच अन्य भाषिकांनाही जवळ केले पाहिजे, असे पदाधिकाऱ्यांनी ठाकरे यांना सांगितले. त्यावर राज ठाकरे यांनी मी मराठीचा मुद्दा असा सोडू शकत नाही, भले मला लोकांनी मते देऊ देत किंवा नकोत, असे सांगितल्याचे कळते. निवडणुकीत पक्षाचे उमेदवार ठरविताना राबवण्यात आलेल्या काही प्रक्रियांवरही नेत्यांनी आक्षेप नोंदवल्याचे कळते. दरम्यान, निवडणुकीतील पराभवाला पक्षात जबाबदार कोण याबाबत या बैठकीत काहीच स्पष्टता झाली नसल्याचे कळते. पक्षात आता अध्यक्ष, नेते, सरचिटणीस आणि कार्यकर्ते असे सरळ तीन गट पडल्याचेही बैठकीतून पुढे आले आहे.

Full Video - हा शेवटचा पराभव, कसं लढायचं शिकलो: राज ठाकरे

मुंबई: महापालिकांचा निकाल म्हणजे पैसा जिंकला आणि कामं हरली. निवडणुका कशा लढायच्या या तुम्ही (जनतेने) मला शिकवलात. जिंकण्यासाठी त्यांनी जे-जे केलं, ते-ते यापुढे मीही करणार. आता झालं एवढं पुरे झालं, हा पराभव शेवटचा असेल, यापुढे पराभव दिसणार नाही, असा एल्गार मनसे अध्यक्ष राज ठाकरे यांनी केला.
मनसेच्या 11 व्या वर्धापन दिनानिमित्त षण्मुखानंद सभागृहात आयोजिक मेळाव्यात राज ठाकरे बोलत होते.
आता जिंकलेत त्यांचे फासे मी घेणार, त्यांचे डाव मी खेळणार असा  इशारा राज ठाकरे यांनी दिला.
आजचं भाषण हे आजपर्यंतचं सर्वात लहान भाषण असेल, असं म्हणत राज ठाकरे यांनी भाषणाला सुरुवात केली.
पैसा जिंकला, काम हरलं
महापालिका निवडणूक निकालाबाबत माझी प्रतिक्रिया विचारण्यासाठी अनेक पत्रकार संपर्क साधत होते. मात्र काय बोलायचं असा प्रश्न पडला होता. कारण निवडणुकीचा निकाल म्हणजे पैसा जिंकला आणि काम हरलं, असाच होता, असं राज ठाकरे म्हणाले.
कामं करुन चूक केली
निवडणूक प्रचारात सत्ताधारी पक्ष कोणत्या थराला जाऊन भांडत होते सर्वांनी पाहिलं.  नाशिकमध्ये आम्ही विकासकामं केली, ती जनतेसमोर घेऊन गेलो. मात्र तरीही आमचा पराभव झाला. नी गुंडांना तिकीटं दिली, ते निवडून आले. भाजपकडे उमेदवार नव्हते, तरीही त्यांचे उमेदवार निवडून आले. त्यामुळे कामं करुन चूक केली, अशी खंत राज ठाकरे यांनी व्यक्त केली.
कसं लढायचं तुम्ही शिकवला
ज्या नागरिकांनी मनसेला मतदान केलं त्यांना धन्यवाद, ज्यांनी नाही केलं त्यांनी मला निवडणूक कशी लढवायची हे शिकवलं. त्यामुळे यापुढे जिंकणाऱ्यांनी ज्या-ज्या गोष्टी केल्या, त्या-त्या गोष्टी यापुढे मीही करणार, तुम्ही मला कसं लढायचं हे शिकवलं, असा एल्गार राज ठाकरे यांनी केला.
यापुढे मी भेटायला येणार
आजपर्यंत तुम्ही मला भेटायला येत होता, आता मी तुम्हाला भेटायला येईन. हा आपला शेवटचा पराभव असेल. यापुढे पराभव दिसणार नाही. आपण जिंकायचंच. त्यासाठी 2019 च्या विधानसभा निवडणुकीच्या तयारीला लागा, असा आदेश राज ठाकरे यांनी कार्यकर्त्यांना दिला.
परिचारकसारख्या माणसांना चौकात चपलाने चोपायला हवं
जवानांच्या कुटुंबाबत आक्षेपार्ह वक्तव्य करणाऱ्या प्रशांत परिचारकसारख्या माणसांना चौकात चपलाने चोपलं पाहिजे, असा घणाघात राज ठाकरे यांनी केला.
राज ठाकरे यांच्या भाषणातील मुद्दे

• आता पाहिलेला पराभव हा शेवटचा पराभव, यापुढे पराभव दिसणार नाही : राज ठाकरे
• आता जे जिंकले आहेत त्यांचे फासे मी घेणार : राज ठाकरे
• जिंकणाऱ्यांनी ज्या-ज्या गोष्टी केल्या, त्या गोष्टी यापुढे मीही करणार, तुम्ही मला कसं लढायचं हे शिकवलं – राज ठाकरे
• आजपर्यंत तुम्ही मला भेटायला येत होता, आता माझ्या सकट आपले सर्व नेते तुमच्या भेटीला येणार आहेत : राज ठाकरे
• नाशिकमध्ये आम्ही कामं केली, ज्यांनी गुंडांना तिकीटं दिली, ते निवडून आले : राज ठाकरे
• प्रशांत परिचारकसारख्या माणसांना चौका-चौकात चपलांनी चोपलं पाहिजे : राज ठाकरे
• भाजपकडे उमेदवार नव्हते, तरीही त्यांचे उमेदवार निवडून आले : राज ठाकरे
• मनसेच्या उमेदवारांना, मतदारांचे धन्यवाद, ज्यांनी मतदान केलं नाही, त्यांनी मला निवडणूक कशी लढवायची शिकवलं : राज ठाकरे
• कामाचा आणि निवडणुकीचा काही संबंध नसतो हे दिसलं, काम उगीच केली असं वाटतंय : राज ठाकरे
• निवडणुकीचा निकाल म्हणजे पैसा जिंकला आणि काम हरलं – राज ठाकरे

मुंबईत भाजप महापौरपदाची निवडणूक लढणार नाही - देवेंद्र फडणवीस, शिवसेनेचे विश्वनाथ महाडेश्वर होणार महापौर.

मुंबई : मुंबईत महापौरपदाची निवडणूक भाजप लढणार नाही, अशी मोठी घोषणा मुख्यमंत्री देवेंद्र फडणवीस यांनी केली. भाजपच्या कोअर कमिटीच्या बैठकीत निर्णयानंतर मुख्यमंत्र्यांनी पत्रकार परिषदेत माहिती दिली. त्यामुळे मुंबईत शिवसेनाचा महापौर होणार, हे निश्चित झालं आहे.
मुंबईत महापौरपदासोबतच उपमहौपर, स्थायी समिती अध्यक्ष, बेस्ट समितीची निवडणूकही भाजप लढणार नाही, अशी माहिती मुख्यमंत्र्यांनी दिली.
मुंबई महापालिकेत भाजप विरोधी पक्षाची भूमिकेत राहणार नाही, तर पारदर्शकतेचे पहारेकरी म्हणून भूमिका भाजप निभावले, असे मुख्यमंत्री म्हणाले. शिवाय, मुंबईसाठी स्वतंत्र उपलोकायुक्त नेमणार, अशी माहिती मुख्यमंत्र्यांनी यावेळी दिली.
मुंबईच्या हितासाठी निर्णय घेतला असून, गरज पडल्यास शिवसेनेला मदत करु. मात्र, शिवसेना सोडून इतर कोणत्याही पक्षाला मतदान करणार नाही, असेही मुख्यमंत्र्यांनी सांगितले.
भाजप मुंबईत यातील कोणतीही निवडणूक लढवणार नाही!

• महापौर
• उपमहापौर
• स्थायी समिती
• बेस्ट समिती
• प्रभाग समिती

शिवसेनेकडून पहिली प्रतिक्रिया :
“मुंबईच्या महापौरपदाची निवडणूक भाजप लढवत नाही, ही आनंदाची बाब आहे. मुंबईकरांचा कौल भाजपने स्वीकारल्याचा आनंदच आहे. त्यामुळे मुख्यमंत्र्यांना धन्यवाद देतो आणि उद्धव ठाकरेंचंही अभिनंदन करतो.”, असे शिवसेनेचे नेते आणि परिवहन मंत्री दिवाकर रावते यांनी दिली.
शिवसेना नेते अनिल परब यांची प्रतिक्रिया : मुंबईत शिवसेनेचा महापौर होईल, याचा आनंद आहेच. भाजपनं काय निर्णय घ्यावा हा त्यांचा प्रश्न होता. शिवाय, समित्यांवर दावा करायचा की नाही, हा भाजपचाच निर्णय आहे, असे शिवसेना नेते अनिल परब  म्हणाले.