महाराष्ट्र म्हणजे मराठी भाषाच - राज ठाकरे

महाराष्ट्र म्हणजे मराठी भाषाच - राज ठाकरे
सकाळ वृत्तसेवा
Saturday, February 27, 2010 AT 12:40 AM (IST)


मुंबई - महाराष्ट्र नवनिर्माण सेनेच्या आंदोलनाचा दुसरा टप्पा हा मराठी भाषेच्या आग्रहाचा असणार आहे. महाराष्ट्र म्हणजे मराठी भाषाच हे समीकरण मनसे करून दाखविणार आहे. महाराष्ट्रातील कानाकोपऱ्यातील प्रत्येक ठिकाणी आम्ही मराठीचा आग्रह धरणार असून आम्ही आमच्या पद्धतीने मराठीकरण करून घेऊ, असा संदेश मनसेचे अध्यक्ष राज ठाकरे यांनी आज जागतिक मराठी भाषा दिनानिमित्त दिला आहे.


महाराष्ट्रातील भाषिक व्यवहार; मग तो तोंडी असो वा लेखी, तो फक्त मराठीच असेल, याबाबत प्रत्येक मराठी माणसाने अतिशय कडवे, आग्रही असायला हवे, अशी अपेक्षा राज ठाकरे यांनी आपल्या चार पानी निवेदनात व्यक्त केली आहे.

संयुक्त महाराष्ट्राच्या आंदोलनानंतर महाराष्ट्रात, मुंबईत मराठी माणसाला, मराठी भाषेला सन्मानाचे, प्रतिष्ठेचे स्थान मिळेल, असे वाटले होते; पण अमेठी-रायबरेलीच्या माध्यमातून महाराष्ट्राचे जे शोषण आझमगड-जौनपूर करीत आहे ते पाहता आता पुन्हा मराठी भाषेसाठी मोठं यज्ञकुंड धगधगवण्याची वेळ आली आहे, असे मतही त्यांनी व्यक्त केले आहे.
अनेक अमराठी लोक येथे महाराष्ट्रात वर्षानुवर्षे, पिढ्यानपिढ्या राहत आहेत, मराठी भाषेचा आदर राखत आहेत, मराठी संस्कृती जपत आहेत, मराठी सण साजरे करीत आहेत. त्यांना आपण मराठीच मानतो, अशी स्पष्ट भूमिका मांडताना ते म्हणाले की, वर्षानुवर्षे येथे राहून मराठी भाषेबद्दल आस्था नसणारे व भाषा बोलता न येणारे; तसेच आपापल्या समाजातील लोकांची लोकसंख्या वाढवून आपला मतदारसंघ निर्माण करणारे व त्यातून महाराष्ट्राला ओरबडण्याची स्वप्ने पाहणारे; तसेच कसेही करून मराठी माणसाला सर्व स्तरातून हाकलून द्यायची इच्छा बाळगणाऱ्यांच्या विरोधात माझे आंदोलन सुरूच राहणार, असा इशाराही त्यांनी दिला.

अयोध्याप्रश्‍नी गोंधळ का घातला - राज ठाकरे

अयोध्याप्रश्‍नी गोंधळ का घातला - राज ठाकरे
सकाळ वृत्तसेवा
Tuesday, February 23, 2010 AT 12:15 AM (IST)

जळगाव - अयोध्येतील वादग्रस्त जागेवरील दावा सोडवा. आम्ही जवळच मोठी मशीद बांधून देऊ, अशी वक्तव्ये करणाऱ्यांना अशीच भूमिका घ्यावयाची होती, तर एवढा गोंधळ का घातला? असे महाराष्ट्र नवनिर्माण सेनेचे संस्थापक अध्यक्ष राज ठाकरे यांनी आज चोपडा येथे सांगितले. चोपडा येथे झालेल्या पत्रकारांशी बोलताना ही माहिती दिली.

मुस्लिमांनी हिंदूंच्या भावनांबाबत उदार दृष्टिकोन बाळगत अयोध्येतील वादग्रस्त जागेवरील दावा सोडावा, आम्ही जवळच मोठी मशीद बांधून देऊ, असे वक्तव्य पक्षाचे नवनिर्वाचित अध्यक्ष नितीन गडकरी यांनी इंदूर येथे नुकत्याच झालेल्या भाजपच्या राष्ट्रीय अधिवेशनात केले होते. त्याचा खरपूस समाचार घेत "मनसे'चे अध्यक्ष राज ठाकरे यांनी थेट नितीन गडकरींवर तोफ डागली. ते म्हणाले, की भाजपची हीच जर भूमिका होती, तर एवढा हंगामा कशाला केला? भाजपने त्याच वेळी जर मशीद बांधून दिली असती, तर एवढ्या दंगली कशाला पेटल्या असत्या?, असा टोलाही त्यांनी लगावला.

मराठी दिनानिमित्त "मनसे'ने राज ठाकरे यांचा संदेश असलेली पुस्तिका तयार केली आहे. ती 27 फेब्रुवारीला महाराष्ट्राच्या घराघरांत पोहोचविली जाईल, तसेच एक पत्रकही माझ्या स्वाक्षरीचे दिले जाणार आहे. पुस्तिकेत "मनसे'तर्फे मराठी अस्मिता जपण्यासाठी काय कार्यक्रम घेतले जातील, त्याबाबतची माहिती दिली आहे. पत्रकात मराठी माणसाला त्याची जाण करून देण्याचा प्रयत्न केला आहे.

श्री. ठाकरे म्हणाले, की मराठी माणसे राष्ट्रीय पातळीवर नेतृत्व करीत आहेत, ही चांगली बाब असली, तरी महाराष्ट्रात कुठलाच राष्ट्रीय पक्ष मराठी अस्मितेसाठी काम करीत नसल्याची खंत आहे. प्रत्येक राज्यात आपल्या राज्याची अस्मिता जपण्याचा प्रयत्न केला जात आहे. मात्र, महाराष्ट्रात तसे घडत नसल्याचे त्यांनी सांगितले. ग्रामीण बेरोजगारीचे प्रश्‍न मिटविणे, हेच माझे प्रमुख उद्दिष्ट असल्याचे त्यांनी या वेळी स्पष्ट केले.

श्री. ठाकरे यांनी काही बाबींबर थेट उत्तर न देता "करू', "बघा' या कोड्यात माहिती दिली. महागाईसंदर्भात ते म्हणाले, की केंद्रीय कृषिमंत्री शरद पवार यांना ज्योतिषी मिळाला आहे. यामुळे निश्‍चितच अन्नधान्याचे भाव कमी होतील. सुमारे 25 मिनिटे त्यांनी पत्रकारांशी चर्चा केली. त्यानंतर ते दुपारी तीनपर्यंत कार्यकर्त्यांशी बोलत राहिले.

राज आणि उद्धव यांच्यात 'सुरक्षित अंतर'

राज आणि उद्धव यांच्यात 'सुरक्षित अंतर'
सकाळ वृत्तसेवा
Monday, February 22, 2010 AT 12:15 AM (IST)


मुंबई - शिवसेनेतून बाहेर पडल्यानंतर राज ठाकरे आणि शिवसेना कार्याध्यक्ष उद्धव ठाकरे आज प्रथमच एकत्र आले. कारण होते शिवसेनेचे ज्येष्ठ नेते मधुकर सरपोतदार यांच्या अंत्यदर्शनाचे; मात्र दोन्ही भावांनी "सुरक्षित अंतर ठेवत' एकमेकांच्या आसपासही जाण्याचे टाळले.

महाराष्ट्र नवनिर्माण सेनेची स्थापना केल्यानंतर शिवसेनाप्रमुख बाळासाहेब ठाकरे यांच्या जवळच्या नेत्यांपैकी एक असणाऱ्या मधुकर सरपोतदार यांचे पुत्र अतुल सरपोतदार आणि त्यांची पत्नी शिल्पा सरपोतदार यांनी मनसेची कास धरली. दोघेही राज यांच्या जवळचे समजले जातात. सरपोतदार यांच्या घरामध्ये शिवसेना आणि मनसे असे दोन्ही पक्ष एकत्र नांदत होते. त्यामुळे त्यांच्या अंत्यसंस्काराला राज ठाकरे यांच्यासह मनसेचे प्रमुख पदाधिकारी आणि उद्धव ठाकरे यांच्यासह शिवसेनेच्या सर्व नेत्यांचा फौजफाटा उपस्थित होता. राज यांच्यानंतर उद्धव अंत्यदर्शनाला आले. अंत्यदर्शनानंतर दोन्ही नेत्यांनी आपापल्या फौजफाट्यासह वेगवेगळे गट करून उभे राहणे पसंत केले. दोन्ही पक्षांचे कार्यकर्ते अंत्यसंस्काराच्या तयारीत गुंतले होते; मात्र त्यांचाही एकमेकांशी संवाद होत नव्हता. उद्धव यांच्याबरोबर आमदार रामदास कदम, खासदार संजय राऊत, चंद्रकांत खैरे, सुभाष देसाई, अनंत गीते आदी नेते उपस्थित होते. प्रदेश कॉंग्रेसचे प्रवक्ते हुसेन दलवाई, आमदार भाई जगताप, माजी खासदार रामदास आठवले अंत्यदर्शनावेळी एकाच ठिकाणी बसले. त्यांच्यात संवाद सुरू होता; मात्र राज आपल्या पक्षाच्या आमदार व कार्यकर्त्यांसह दूरवर शांतपणे उभे होते.

उद्धव आणि राज यांनी एकमेकांच्या समोर येण्याचे मोठ्या चतुराईने टाळले. अंत्ययात्रा सुरू झाल्यानंतरही दोन्ही पक्षाचे गट वेगवेगळे चालले होते. उद्धव पुढे तर, राज त्यांच्या कार्यकर्त्यांच्या गराड्यात मागून चालले होते. अंत्ययात्रेत दोन्ही गटांच्या मधूनच चालणाऱ्या पोलिसांच्या गाडीमुळे दोन्ही गटांतील अंतर अधिकच वाढले होते.

अणुऊर्जा प्रकल्पांना विरोध कृतीतून दाखवू - राज ठाकरे

अणुऊर्जा प्रकल्पांना विरोध कृतीतून दाखवू - राज ठाकरे
सकाळ वृत्तसेवा
Thursday, February 18, 2010 AT 12:30 AM (IST)


चिपळूण - "कोकणचा विकास करण्यासाठी इतर अनेक पर्याय असताना केवळ अणुऊर्जा प्रकल्पच कोकणच्या माथी का मारले जात आहे ? महाराष्ट्र नवनिर्माण सेनेचा अणुऊर्जा प्रकल्पांना असलेला विरोध कृतीतून दाखवू'', असा इशारा मनसेचे अध्यक्ष राज ठाकरे यांनी आज पत्रकार परिषदेत सरकारला दिला.

ते म्हणाले, ""अमेरिकेत 1973 नंतर दोन अणुऊर्जा प्रकल्पांना राष्ट्राध्यक्ष बराक ओबामा यांनी मान्यता दिली आहे. पण या प्रकल्पांना अमेरिकेच्या सिनेटने अजून मान्यता दिलेली नाही. चीनमध्ये अणुबॉम्बचा स्फोट झाल्यापासून कायदे कडक करण्यात आले आहेत. एखाद्या प्रदेशात अणु प्रकल्प साकारायचा असेल तर त्याला इंटरनॅशनल लॉ ची परवानगी घ्यावी लागते. लोकसभेत अद्यापपर्यंत तसा प्रस्तावही मांडण्यात आलेला नाही. अणुऊर्जा प्रकल्पांविषयी केंद्र सरकारकडून योग्य माहिती दिली जात नाही. असे असताना जमीन संपादित करण्याचा डाव का रचला जात आहे, महाराष्ट्राचे नेते का गप्पा आहेत.''

महाराष्ट्राला भारनियमन मुक्त करण्यासाठी वीज उत्पादनाची मोठी गरज आहे. त्यासाठी एकट्या कोकणमध्ये 21 ऊर्जा प्रकल्प आणणे हा पर्याय असू शकत नाही. कोकणची जमीन सुपीक आहे. शेतीसाठी योग्य असलेल्या या जमिनीत प्रकल्प उभारण्यापेक्षा नापिक जमिनीत अणुऊर्जा प्रकल्प उभारा. अणुऊर्जा प्रकल्पातून कोकणचा कोळसा करण्यापेक्षा येथे येणारे प्रकल्प राज्याच्या विविध भागात विभागून द्या. समुद्रकिनारा नसलेल्या प्रदेशामध्ये प्रकल्प कसे उभे राहिले. डहाणुमध्ये रिलायन्स कंपनीने 100 टक्के प्रदूषण मुक्त वीज प्रकल्प उभारला आहे. त्याची माहिती मी घेतली आहे. अशा प्रकारचे प्रकल्प सरकारने हाती घेतले तर आम्ही सरकारच्या निर्णयाचे स्वागत करू; मात्र अणुऊर्जा प्रकल्पांना मनसेचा विरोध असेल आणि तो आम्ही कृतीतून दाखवून देऊ, असे त्यांनी सांगितले

राहुल गांधींचा मुंबई दौरा म्हणजे 'पॅकेज डील' - राज ठाकरे

राहुल गांधींचा मुंबई दौरा म्हणजे 'पॅकेज डील' - राज ठाकरे
सकाळ वृत्तसेवा
Wednesday, February 17, 2010 AT 01:00 AM (IST)


रत्नागिरी - "कॉंग्रेसच्या राहुल गांधींचा मुंबई दौरा हा ठरवून केलेले "पॅकेज डील' आहे. या दौऱ्यात त्यांनी केलेली राजकीय वक्‍तव्ये म्हणजे मूर्खपणाचा कळस आहे. त्यांचा दौराही शाहरूख खानसारखाच ठरवून केलेला वाटला,'' अशा शब्दांत मनसे अध्यक्ष राज ठाकरे यांनी राहुल गांधींच्या मुंबई दौऱ्याची खिल्ली उडविली.

मनसे पदाधिकाऱ्यांच्या बैठका घेण्यासाठी रत्नागिरीत आलेल्या राज ठाकरे यांची शासकीय विश्रामगृहात पत्रकारांनी भेट घेतली. सुरवातीलाच मी पत्रकार परिषद घेत नाही. तुम्ही प्रश्‍न विचाराल तर त्याची मी नक्‍कीच उत्तरे देईन, असे सांगून प्रस्तावना टाळली. राहुल गांधी यांच्या मुंबई दौऱ्यानंतर राज ठाकरे यांनी वक्‍तव्य केले नव्हते; मात्र काही काळ गेल्यानंतर आज रत्नागिरीत त्यांना पत्रकारांनी छेडले असता त्यांनी राहुल गांधींचा दौरा हा ठरवून केल्याचे सांगत त्यांची खिल्ली उडविली.

माडबन आणि एकूणच ऊर्जा प्रकल्पांबाबत त्यांची भूमिका ही सावधपणाची होती. ते म्हणाले, ""ऊर्जा प्रकल्प हे काळाची गरज आहे. त्यामुळे लोकांचा विरोध का आहे याचा अभ्यास करण्याची गरज आहे. माडबन प्रकल्पामुळे होणाऱ्या धोक्‍याविषयी तेथील लोकांना माहिती दिली पाहिजे. अमेरिकने हे प्रकल्प का बंद केले याचाही अभ्यास करण्याची गरज आहे. दुसऱ्याने टाकून दिलेल्या गोष्टी उचलायला काही महाराष्ट्र लुळा-पांगळा नाहीय. ज्या प्रकल्पांना विरोध करायचा त्यांना मनसे स्टाईलने विरोध नक्‍कीच करणार.''

संघटनेतील फेरबदलासंदर्भात पत्रकारांनी विचारले असता त्यांनी सध्या कोणतेही बदल करणार नसल्याचे सांगितले. पदाधिकारी हे तरुण, उमेदीचे आहेत. त्यांच्याकडे अनुभव नाही. ती कमी पूर्ण झाली तर ते उत्तम काम करू शकतील. संयम ठेवून काम करीत आहेत. त्यामुळे भविष्य चांगले आहे, असे श्री. ठाकरे यांनी स्पष्ट केले. सुरक्षिततेमध्ये पोलिस कमी पडत आहेत का याविषयी विचारले असता ते म्हणाले, ""याला पोलिस जबाबदार आहेत, असे म्हणता येणार नाही. सरकारचे धोरणच नसल्यामुळे सुरक्षिततेचा मुद्दा पुढे येत आहे. त्यासाठी मुळात योग्य धोरण ठरविण्याची गरज आहे.''

"ती' रेकॉर्ड जुनी
ऑस्ट्रेलियाच्या संघाला खेळू देणार असा इशारा दिल्यानंतर बाळासाहेब ठाकरे आणि शरद पवार भेट हा विषय दुसरीकडे फिरविण्याचा प्रकार आहे. या पार्श्‍वभूमीवर बाळासाहेब ठाकरेंची काल (ता. 15) काही वृत्तवाहिन्यांवर प्रसारित झालेली ती रेकॉर्डही पवार यांच्या भेटीपूर्वीची असल्याचा गौप्यस्फोट राज ठाकरे यांनी केला आहे. याविषयी आजच सकाळी मला मुंबईच्या काही पत्रकारांनी ही माहिती दिल्याचेही त्यांनी सांगितले. त्यामध्ये किती सत्य आहे हे मला माहिती नाही, असे सांगतानाच यावरून खेळाडूंना खेळायला देणार नाही ही धमकी एक प्रकारे गंमतीशीर असल्याचा टोलाही लगावला

मुंबईवर मराठी तरुणांचाच हक्क - राज ठाकरे

मुंबईवर मराठी तरुणांचाच हक्क - राज ठाकरे
सकाळ वृत्तसेवा
Tuesday, February 16, 2010 AT 12:45 AM (IST)

कणकवली - "राज्यात वेगवेगळे उद्योग येऊनही त्यात स्थानिकांना नोकऱ्या मिळत नाहीत. स्थानिकांना त्यांचा हक्क मिळावा, यासाठीच आर्थिक राजधानी असलेल्या मुंबईवर मराठी माणसाचा, इथल्या तरुणांचा पहिला हक्क असल्याची भूमिका घेतली आहे,'' असे प्रतिपादन महाराष्ट्र नवनिर्माण सेनेचे अध्यक्ष राज ठाकरे यांनी आज केले.

श्री. ठाकरे गेले दोन दिवस सिंधुदुर्ग जिल्हा दौऱ्यावर आहेत. आज ते येथे आले होते. या वेळी आमदार शिशिर शिंदे, कोकण संपर्कप्रमुख शिरीष सावंत, जिल्हा सपंर्कप्रमुख उदय सावंत, जिल्हाध्यक्ष राजन दाभोळकर आदी उपस्थित होते. श्री. ठाकरे यांचे येथे जोरदार स्वागत झाले. देवगड, वैभववाडी, कणकवलीहून शेकडोंनी तरुण त्यांना भेटण्यासाठी आले होते. येथील पटवर्धन चौकात मिरवणूक काढण्यात आली. शासकीय विश्रामगृहावर त्यांनी तिन्ही तालुक्‍यांतील पदाधिकाऱ्यांच्या बैठका घेतल्या. त्यानंतर माहिती देताना श्री. ठाकरे म्हणाले, ""सिंधुदुर्गात मला उत्स्फूर्त प्रतिसाद मिळाला. त्यामुळे आमची संघटना निश्‍चितच आकार घेईल. पक्षातील तरुण कार्यकर्त्यांना मार्गदर्शन करण्यासाठी आपण येथे आलो होतो. येत्या काळात कार्यशाळा घेणार आहे. राज्यभरात पक्ष सभासद नोंदणी पंधरवडा येत्या 21 तारखेपासून सुरू होत आहे. यात जास्तीत जास्त सभासद होतील.''

ते म्हणाले, ""राज्य सरकार सर्वच पातळीवर अपयशी ठरले आहे. कोण कधी येते, कसे येते, हे समजतच नाही. परिणामी बॉंबस्फोट होत आहेत. राज्यात विविध उद्योग येत आहेत. या उद्योगांमध्ये महाराष्ट्रातील तरुणांना रोजगार मिळत नाही. तो मिळावा म्हणून आपण मुंबईवर मराठी माणसाचा हक्क आहे, अशी भूमिका घेतली आहे.''

राज्यातील ग्रामीण भागात विविध समस्या आहेत. याबाबत आपले मत काय, असे विचारले असता श्री. ठाकरे म्हणाले, ""मुंबईत मोठ्या प्रमाणात रोजगार आहेत; पण हे रोजगार परप्रांतीयांच्या हातात जात आहेत. रोजगार नसल्याने विविध प्रश्‍न राज्यात निर्माण होत आहेत. त्यासाठी मराठी आपल्याला वाचवावी लागेल. राज्य सरकारने मुंबईत साडेचार हजार परवाने टॅक्‍सीसाठी देणे जाहीर केले. यावर मराठी माणसाचा हक्क राहिला पाहिजे. यापुढे सर्वच निवडणुकांमध्ये पक्ष उतरणार नसून जेथे संधी मिळेल तेथे योग्य उमेदवार देऊन निवडणूक लढण्याचा प्रयत्न राहील.''

तरुणाईचा प्रतिसाद
राज ठाकरे यांच्या भूमिकेवर सिंधुदुर्ग जिल्ह्यातील तरुणही सहमत असल्याचे चित्र होते. जिल्ह्यातील दौऱ्यात त्यांना भेटण्यासाठी तरुणांची उपस्थिती लक्षणीय होती. विशेषतः म्हणजे विशीतील तरुणांचा सहभाग यात जास्त होता.

राज ठाकरेंचे कणकवलीत स्वागत

कणकवली - महाराष्ट्र नवनिर्माण सेनेचे अध्यक्ष राज ठाकरे यांचे आज सकाळी साडेअकरा वाजता येथे जल्लोषी स्वागत करण्यात आले. कणकवली, देवगड, वैभववाडी येथील कार्यकर्त्यांनी फटाके वाजवून तसेच ढोल-ताशांच्या दणदणाटात स्वागत केले. तत्पूर्वी मनसेच्या कार्यकर्त्यांनी येथील पटवर्धन चौकापासून शासकीय विश्रामगृहापर्यंत मिरवणूकही काढली.

मनसेच्या स्थापनेनंतर राज ठाकरे प्रथमच येथे येत असल्याने मनसे कार्यकर्त्यांबरोबरच शहरवासीयांमध्येही उत्सुकता होती. सकाळी नऊपासूनच शासकीय विश्रामगृह येथे देवगड, कणकवली आणि वैभववाडीतील मनसे कार्यकर्त्यांनी गर्दी केली होती. शहरात वातावरणनिर्मितीसाठी मनसेच्या कार्यकर्त्यांनी अप्पासाहेब पटवर्धन चौक ते शासकीय विश्रामगृह अशी ढोल-ताशांच्या दणदणाटात मिरवणूकही काढली. मनसे कार्यकर्त्यांच्या गाड्यांचा ताफाही यात समाविष्ट होता. मालवण येथून निघालेले राज ठाकरे शासकीय विश्रामगृहावर साडेअकरा वाजता आले. या वेळी त्यांच्याभोवती कार्यकर्त्यांचा गराडा पडला. मुंबई-गोवा राष्ट्रीय महामार्गावर फटाक्‍यांची आतषबाजीही झाली. "राज ठाकरे झिंदाबाद।।'च्या घोषणाही कार्यकर्त्यांनी दिल्या. मनसेचे कोकण संपर्कनेते शिरीष सावंत, संपर्कप्रमुख उदय सावंत, जिल्हाध्यक्ष राजन दाभोळकर, सहसंपर्कप्रमुख गुरुदत्त काडगे, विजयानंद पेडणेकर, सुधीर जाधव आदींनी श्री. ठाकरे यांचे पुष्पगुच्छ देऊन स्वागत केले. मनसेच्या महिला कार्यकर्त्यांनी श्री. ठाकरे यांचे आरती ओवाळून स्वागत केले. त्या नंतर कार्यकर्त्यांच्या अभिवादनाचा स्वीकार करीत श्री. ठाकरे यांनी तडक शासकीय विश्रामगृह गाठले. दरम्यान, राजना पाहण्यासाठी शहरातील नागरिकांनीही शासकीय विश्रामगृहावर गर्दी केली होती.