राज ठाकरे पुण्याहून औरंगाबादला निघाले

राज ठाकरे पुण्याहून औरंगाबादला निघाले

सकाळ वृत्तसेवा

Wednesday, January 12, 2011 AT 12:55 PM (IST)

औरंगाबाद  -  आमदार हषवर्धन जाधव यांना पोलिसांनी केलेल्या मारहाणीचा निषेध करण्यासाठी महाराष्ट्र नवनिर्माण सेनेचे अध्यक्ष राज ठाकरे हे आज संध्याकाळी मराठवाडा सांस्कृतिक मंडळाच्या मैदानावर जाहीर सभा घेणार आहेत.  या सभेसाठी दुपारी बारा वाजता श्री. ठाकरे हे पुण्याहून औरंगाबादला येण्यासाठी निघाले आहेत. साधारणतः दुपारी चार ते साडेचार वाजण्याचा दरम्यान ठाकरे यांचे औरंगाबादेत आगमन होणार आहे. तेथून ते थेट सुभेदारी विश्रामगृहावर जाणार आहेत.

दरम्यान, आमदार जाधव यांना हर्सुल कारागृहात सोडण्याची कारवाई सुरू आहे. तर श्री. ठाकरे यांच्या सभेला गर्दी व्हावी, असे नियोजन पक्षाच्या स्थानिक आणि मराठवाडा पातळीवरच्या नेत्यांनी केले आहे.  मराठवाड्यातील पक्षाच्या प्रत्येक संघटनेच्या कार्यकर्त्याला सभेला येण्याचे आवाहन करण्यात आले आहे. त्याचप्रमाणे विदर्भातील बुलडाणा, अकोला आणि वाशिम येथुनही कार्यकर्त्यांना बोलावण्यात आले आहे. तर मुंबईहून मोठ्या प्रमाणावर पक्षाचे कार्यकर्ते या सभेला येणार आहेत. राज ठाकरे आपल्या भाषणातून महाराष्ट्राच्या राजकारणाला नवी दिशा देतील असा विश्‍वास कार्यकर्त्यांना आहे. 

'राज'च्या सभेवर पोलिसांच्या 200 कॅमेऱ्यांची नजर

'राज'च्या सभेवर पोलिसांच्या 200 कॅमेऱ्यांची नजर

सकाळ वृत्तसेवा

Wednesday, January 12, 2011 AT 12:15 AM (IST)

औरंगाबाद - महाराष्ट्र नवनिर्माण सेनेचे अध्यक्ष राज ठाकरे यांच्या आमदार हर्षवर्धन जाधव यांना पोलिसांनी केलेल्या मारहाणीचा निषेध करण्यासाठी बुधवारी (ता. 12) आयोजित केलेल्या सभेसाठी पोलिसांनी मोठा बंदोबस्त तैनात केला आहे. त्याशिवाय अत्याधुनिक तंत्राचा वापर करून या सभेवर नजर ठेवण्याचीही तयारी पोलिसांनी केली आहे. त्यासाठी मराठवाड्यातून दोनशे व्हिडिओ कॅमेरे मागविण्यात आले आहेत.

ही सभा बुधवारी (ता. 12) संध्याकाळी साडेपाच वाजता मराठवाडा सांस्कृतिक मंडळाच्या मैदानावर होणार आहे. या सभेला पोलिसांनी परवानगी देताना काही अटी घातल्या आहेत. त्यामध्ये भावना दुखावतील किंवा प्रक्षोभ होईल, असे वक्तव्य केल्यास प्रमुख वक्‍त्यासह आयोजकांवर गुन्हा दाखल करण्यात येईल, अशा स्वरूपाच्या अटी आहेत. त्याचप्रमाणे ही सभा वेळेवर सुरू व्हावी आणि वेळेवर संपवावी, अशीही अट घातली आहे. या सभेसाठी बाहेरच्या जिल्ह्यांतून कार्यकर्ते येणार असल्याने शहरात येणाऱ्या प्रत्येक मार्गावर तपासणी केली जाणार आहे. तर वाहनांचे व्हिडिओ शूटिंगही केले जाणार आहे. शहरातील प्रमुख चौकांसह सभेच्या ठिकाणी मोठा बंदोबस्त तैनात करण्यात आला असल्याची माहिती सिटी चौक पोलिस ठाण्याचे वरिष्ठ पोलिस निरीक्षक खुशालचंद बाहेती यांनी दिली.

या बंदोबस्तात राज्य राखीव पोलिस दलाचे जवान, शीघ्र कृती दल, दंगा काबूचे पथक, "एसआरपीएफ'च्या दोन कंपन्या; तसेच वज्र आणि पाण्याचा मारा करणाऱ्या वाहनांनाही तैनात करण्यात आले आहे. शहर पोलिसांच्या मदतीला बीड, जालना, उस्मानाबाद येथून पोलिस कुमक मागविण्यात आली आहे. शहराबाहेरून येणाऱ्या कार्यकर्त्यांना ओळखणाऱ्या त्या-त्या शहराचे विशेष शाखेचे पोलिस कर्मचारीही शहरात दाखल झाले आहेत. शहरात येणाऱ्या प्रत्येक मार्गावर पोलिस तैनात करण्यात आले आहेत. प्रत्येक वाहनांचे व्हिडिओ शूटिंग केले जाणार आहे. त्यामध्ये येणाऱ्या कार्यकर्त्यांना ओळखता येईल, या पद्धतीने शूटिंग करण्याचा आदेशही देण्यात आला आहे. तर शहरात 60 ठिकाणी फिक्‍स पॉइंट लावण्यात आले आहेत. प्रत्येक पॉइंटवर सभेला जाणाऱ्यांची शूटिंग केली जाणार आहे. सभेच्या ठिकाणीदेखील मोठ्या प्रमाणावर कॅमेऱ्यांचा वापर करून शूटिंग करणार असल्याची माहिती पोलिस निरीक्षक बाहेती यांनी दिली. सभा आटोपल्यावर काही अनुचित प्रकार करताना कोणी आढळलयास त्या ठिकाणी कलर सोडणाऱ्या "डाय गॅस'चा वापर करण्यात येणार आहे.

'डाय गॅस'चा वापर करणारराज ठाकरेंच्या सभेत पहिल्यांदाच "डाय गॅस'चा वापर केला जाणार आहे. जर या सभेत किंवा सभेनंतर जर गोंधळ झाला तर पोलिस ज्याप्रमाणे अश्रुधुराचा वापर करतात, त्याच पद्धतीने या "डाय गॅस'चा वापर करणार आहेत. या गॅसमधून रंग बाहेर पडतो, तो रंग होळीच्या रंगाप्रमाणे अंगाला लागतो. एकदा हा रंग लागला, की तो पंधरा दिवस तरी निघत नाही. त्यामुळे नंतर गुन्हे दाखल करण्यासाठी किंवा गोंधळ घालणाऱ्यांना पकडण्यासाठी ही पद्धत वापरली जाते. त्याचा वापर या सभेसाठी पहिल्यांदा औरंगाबादेत केला जात आहे

जाधव, बनकर यांची हर्सूल कारागृहात रवानगी

जाधव, बनकर यांची हर्सूल कारागृहात रवानगी

सकाळ वृत्तसेवा

Tuesday, January 11, 2011 AT 12:56 PM (IST)

औरंगाबाद - पोलिसांनी केलेल्या मारहाणप्रकरणी आमदार हषवर्धन जाधव आणि महाराष्ट्र नवनिर्माण सेनेचे जिल्हाध्यक्ष दिलीप बनकर पाटील यांना आज (मंगळवार) हर्सूल कारागृहात हलविण्यात आले. बुधवारी (ता. 12) महाराष्ट्र नवनिर्माण सेनेचे अध्यक्ष राज ठाकरे यांची जाहीर सभा औरंगाबादेत होणार आहे, त्या पार्श्‍वभूमीवर पोलिसांनी आमदार जाधव आणि दिलीप बनकर पाटील यांची हर्सूलमध्ये रवानगी केल्याची शक्‍यता वर्तविण्यात येत आहे.

वेरूळ लेणी येथे मुख्यमंत्री पृथ्वीराज चव्हाण यांना भेटण्यासाठी निघालेल्या जाधव आणि बनकर पाटील यांना पोलिसांनी मारहाण केली होती. त्यानंतर साधारणतः दोन दिवस आमदार जाधव यांच्यावर एका खासगी रुग्णालयात उपचार सुरू होते.त्यानंतर त्यांना न्यायालयासमोर हजर केले असता न्यायालयाने त्यांना न्यायालयीन कोठडीत ठेवण्याचा आदेश दिला. त्यावेळी आमदार जाधव यांना वैद्यकीय उपचारासाठी शासकीय रुग्णालयात नेण्याचे आदेश दिले होते. मात्र, पोलिसांनी त्यांना उपचारानंतर हर्सूल कारागृहात नेण्याऐवजी तिथेच उपचारार्थ दाखल केले. त्यामुळे न्यायालयाने त्यांना कारणे दाखवा नोटीस बजावली होती. त्या पार्श्‍वभूमीवर पोलिसांनी आज त्यांना हर्सूल कारागृहात दाखल केले आहे. 

जाधव यांच्या भेटीला ठाकरे, विलासराव देशमुख, मुंडे, पालकमंत्रीही

जाधव यांच्या भेटीला ठाकरे, विलासराव देशमुख, मुंडे, पालकमंत्रीही

सकाळ वृत्तसेवा

Monday, January 10, 2011 AT 12:15 AM (IST)

औरंगाबाद - महाराष्ट्र नवनिर्माण सेनेचे अध्यक्ष राज ठाकरे यांनी रविवारी (ता. नऊ) सकाळी 11 वाजता न्यायालयाच्या आदेशाने घाटी रुग्णालयात जाऊन जखमी आमदार हर्षवर्धन जाधव आणि जिल्हाध्यक्ष दिलीप बनकर पाटील यांची भेट घेतली. त्यांनी आमदार जाधव यांच्याशी एकांतात चर्चा केली.
दरम्यान, रविवारी दिवसभरात आमदार जाधव यांना केंद्रीय अवजड उद्योगमंत्री विलासराव देशमुख, खासदार गोपीनाथ मुंडे, पालकमंत्री बाळासाहेब थोरात, आमदार संभाजी पाटील निलंगेकर यांनी भेट घेतली.

मुख्यमंत्र्यांच्या भेटीला निघालेल्या आमदार हषवर्धन जाधव यांना वेरूळ लेणीच्या पायथ्याशी पोलिसांनी मारहाण केली. त्यानंतर त्यांना खुलताबाद पोलिस ठाण्यात नेऊनही मारहाण करण्यात आली. त्यानंतर रविवारी (ता. नऊ) त्यांच्या प्रकृतीची चौकशी करण्यासाठी नवनिर्माण सेनेचे अध्यक्ष राज ठाकरे औरंगाबाद येथे आले होते. ते विमानतळावरून सुभेदारी विश्रामगृहात आले. तेथून ते आमदार जाधव यांना भेटण्यासाठी घाटी रुग्णालयात पोहचले. तत्पूर्वी श्री. ठाकरे यांना भेटण्यासाठी न्यायालयाची परवानगी घ्यावी लागली.

सध्या आमदार जाधव हे न्यायालयीन कोठडीत असून, त्यांना न्यायालयाच्या आदेशाने घाटी रुग्णालयात दाखल करण्यात आले आहे. त्यामुळे ही परवानगी श्री. ठाकरे यांना घ्यावी लागली. आमदार जाधव यांना भेटण्यासाठी राज ठाकरे हे खास हेलिकॅप्टरने मुंबईहून औरंगाबादला आले होते. त्यांच्यासोबत आमदार शिशिर शिंदे, अतुल सरपोतदार, अविनाश अभ्यंकर, संजय चित्रे होते. या वेळी घाटी रुग्णालयाच्या परिसरात मोठा पोलिस बंदोबस्त लावण्यात आला होता.
श्री. ठाकरे यांनी पक्षाचे जिल्हाध्यक्ष आणि या प्रकारात जखमी झालेल्या दिलीप बनकर यांचीही भेट घेतली. या वेळी आमदार जाधव यांच्या मातोश्री माजी जिल्हा परिषद सदस्या तेजस्विनी जाधवही उपस्थित होत्या. श्री. ठाकरे यांना एकट्यालाच आमदार जाधव यांना भेटण्याची परवानगी देण्यात आली होती. त्यामुळे मुंबईहून ठाकरे यांच्यासोबत आलेल्या आमदार शिशिर शिंदे यांच्यासह नेत्यांनाही खोलीच्या बाहेर थांबावे लागले. सुमारे दहा ते पंधरा मिनिटे ठाकरे यांनी आमदार जाधव यांच्याशी चर्चा केली. त्यानंतर ते सुभेदारीकडे रवाना झाले.

दरम्यान, राज ठाकरे आलेले असताना आमदार जाधव यांचे सासरे खासदार रावसाहेब दानवे यांनाही आमदार जाधव यांच्या खोलीत जाण्यास मज्जाव करण्यात आला होता. त्यावेळी खासदार दानवे आणि पोलिसांमध्ये वादावादी झाली.

"शोध मराठी मनाचा' कार्यक्रमाच्या समारोपानंतर केंद्रीय अवजड उद्योगमंत्री विलासराव देशमुख, खासदार गोपीनाथ मुंडे, पालकमंत्री बाळासाहेब थोरात, आमदार संभाजी पाटील निलंगेकर यांनी आमदार श्री. जाधव यांची भेट घेतली. या वेळी श्री. देशमुख यांनी या प्रकरणी आपण कारवाई करण्यासाठी पाठपुरावा करू, असे आश्‍वासन दिले, तर श्री. मुंडे यांनी या मारहाणीचा निषेध केला.

शिवसेनेचे कार्यकारी अध्यक्ष उद्धव ठाकरे यांच्या आदेशाने आमदार जाधव यांना झालेल्या मारहाणप्रकरणी खासदार चंद्रकांत खैरे यांच्या नेतृत्वाखाली एक चौकशी समिती नियुक्ती केली आहे. त्यामध्ये आमदार संजय सिरसाठ, आमदार किशनचंद तनवाणी आणि आमदार संतोष सांबरे यांचा समावेश आहे. या समितीनेही रविवारी (ता. नऊ) आमदार जाधव यांची भेट घेतली. या वेळी जिल्हाप्रमुख अंबादास दानवेही उपस्थित होते.

राज ठाकरेंनी केली जाधवांची विचारपूस

राज ठाकरेंनी केली जाधवांची विचारपूस

सकाळ वृत्तसेवा

Sunday, January 09, 2011 AT 11:45 AM (IST)

औरंगाबाद - पोलिसांनी केलेल्या मारहाणीत जंभीर जखमी झालेले महाराष्ट्र नवनिर्माण सेनेचे कन्नड येथील आमदार हर्षवर्धन जाधव यांची विचारपूस करण्यासाठी "मनसे'चे अध्यक्ष राज ठाकरे आज शहरात दाखल झाले. घाटी रूग्णालयात उपचार घेत असलेल्या जाधव यांची विचारपूस करण्यासाठी ते रूग्णालयात पोहोचले. तेथे ते सुमारे १५ मिनिटे होते. या वेळी रूग्णालयाबाहेर "मनसे'च्या कार्यकर्त्यांची प्रचंड गर्दी झाली होती.

जाधव यांची भेट घेतल्यानंतर राज ठाकरे पत्रकारांशी बोलणार असून ते काय भूमिका घेतात याकडे सर्वांचे लक्ष लागले आहे.

दरम्यान, राज्याचे कृषिमंत्री आणि जिल्ह्याचे पालकमंत्री बाळासाहेब थोरात यांच्या अध्यक्षतेखाली आयोजित करण्यात आलेल्या जिल्हा नियोजन विकास समितीच्या पहिल्याच बैठकीत शिवसेनेचे खासदार चंद्रकांत खैरे यांच्या नेतृत्वाखाली सर्वपक्षीय आमदारांनी हर्षवर्धन जाधव यांना पोलिसांनी केलेल्या मारहाणीचा निषेध करणारे निवेदन दिले असून संबंधित पोलिस अधिकाऱ्यांवर कारवाई करण्याची मागणी केली.

मनसे आमदार मारहाणीचा सेनेकडून निषेध

मनसे आमदार मारहाणीचा सेनेकडून निषेध

सकाळ वृत्तसेवा

Saturday, January 08, 2011 AT 04:43 PM (IST)

मुंबई - मनसेचे आमदार हर्षवर्धन जाधव यांना पोलिसांनी केलेल्या मारहाणीचा शिवसेनेचे कार्याध्यक्ष उद्धव ठाकरे यांनी तीव्र शब्दात निषेध व्यक्त केला आहे. याप्रकरणी जाधव यांची बाजू ऐकून घेण्यासाठी शिवसेनेचे एक पथक औरंगाबादला पाठविण्याची त्यांनी घोषणा केली आहे.

उद्धव ठाकरे म्हणाले,""मनसेचे आमदार हर्षवर्धन जाधव यांना पोलिसांनी केलेल्या मारहाणीचा आम्ही तीव्र निषेध करतो. मारहाणीस जबाबदार असलेल्या पोलिसांना गडचिरोलीत नक्षलवाद्यांचा सामना करण्यासाठी पाठवायला हवे. पोलिसांची अरेरावी कोणत्याही परिस्थितीत सहन केली जाणार नाही.''

दरम्यान, जाधव यांची बाजू ऐकून घेण्यासाठी शिवसेनेना आमदारांची तीन सदस्यीय समिती औरंगाबादला जाणार आहे.

मनसेतर्फे आजपासून 9 रु. दराने कांदाविक्री

मनसेतर्फे आजपासून 9 रु. दराने कांदाविक्री

सकाळ वृत्तसेवा

Sunday, January 09, 2011 AT 12:00 AM (IST)

मुंबई - कांदाभाववाढीमुळे सर्वसामान्यांच्या डोळ्यात आलेले पाणी पुसण्यासाठी महाराष्ट्र नवनिर्माण महिला सेनेने कंबरी कसली आहे. गेल्या काही दिवसांत साठ ते सत्तर रुपये किलो भावाने विकला जाणारा कांदा उद्या (ता.9) पासून मुंबई व ठाण्यात फक्त 9 ते 13 रुपये किलोने मनसे उपलब्ध करून देणार आहे.

याबाबत महाराष्ट्र नवनिर्माण महिला सेनेच्या उपाध्यक्षा शालिनी ठाकरे यांनी सांगितले, की राज्यातील शेतकरी नऊ रुपये किलोने कांदा विकत असताना सर्वसामान्य जनतेला मात्र हा कांदा तब्बल 60 ते 70 रुपये किलोने विकत घ्यावा लागत आहे. कांद्यांच्या दरातील ही वाढ दलाल व विक्रेत्यांचा नफा लक्षात घेतला असता अक्षरशः विकृत वाटते. विक्रेत्यांच्या या बेसुमार नफेखोरीला आळा घालण्यासाठी मनसे थेट शेतकऱ्यांकडून कांदा विकत घेऊन सर्वसामान्य जनतेला 9 ते 13 रुपये किलोने विकणार आहे.

शिवडी-भायखळा परिसरात आमदार बाळा नांदगावकर व मनसेच्या उपाध्यक्षा आशा मामेदी, गोरगाव परिसरात शालिनी ठाकरे, बोरिवलीमध्ये आमदार प्रवीण दरेकर, तर दादरमध्ये आमदार नितीन सरदेसाई व मनमसेच्या उपाध्यक्षा रिटा गुप्ता यांच्या पुढाकाराने सवलतीच्या दराने कांद्याची विक्री करण्यात येणार आहे.