मराठी दिनाच्या पूर्वसंध्येला मनसेची कुसुमाग्रज उद्यानात ‘चकाचक’ गांधीगिरी

मराठी दिनाच्या पूर्वसंध्येला मनसेची

कुसुमाग्रज उद्यानात ‘चकाचक’ गांधीगिरी
 नाशिक, २६ फेब्रुवारी / प्रतिनिधी
तात्यासाहेब शिरवाडकर तथा कुसुमाग्रज यांचा जन्मदिन अर्थात मराठी दिनाच्या पाश्र्वभूमीवर, कविवर्य कुसुमाग्रज काव्य उद्यानात मनसेने स्वच्छता मोहीम राबवून गांधीगिरी स्टाईलने आंदोलन केले. तसेच या उद्यानाच्या सौदर्यकरणासाठी मनसेचे विधानसभेतील उपगटनेते आ. वसंत गीते यांनी दहा लाख रूपयांचा निधी आमदार निधीतून उपलब्ध करून दिला आहे. दरम्यान, कुसुमाग्रज जन्मशताब्दी वर्षांनिमित्त, शहरात विविध उपक्रमांचे आयोजन करण्यात आले आहे. कुसुमाग्रजांच्या नाशकात नाशिक महापालिकेने निर्मिलेले उद्यान सध्या अत्यंत दुर्लक्षित आहे. त्यामुळे ठिकठिकाणी कचऱ्याचे मोठय़ा प्रमाणावर ढिग साचलेले होते. यामुळे मनसेने गांधीगिरी स्टाईलने आंदोलन करून केरकचरा, मातीचे ढिग, पालापाचोळा साफ केला. मनसेचे जिल्हाध्यक्ष सचिन ठाकरे यांच्या नेतृत्वाखाली कार्यकर्ते सहभागी झाले होते. यावेळी संपूर्ण उद्यान परिसरासह व कोनशिला पाण्याने धुवून काढण्यात आली.
 झाडांना पाणी देण्यात आले. कुसुमाग्रजांच्या प्रतिमेचे तसेच कोनशिलेस पुष्पहार अर्पण करून आदरांजली वाहण्यात आली. मनसेचे आ. गीते यांनी उद्यानासाठी उपलब्ध करून दिलेल्या निधीतून या कामाचे प्राकलन त्वरित काढण्याचे निर्देश पालिकेस दिले आहेत. याप्रसंगी अनील वाघ, समीर शेटे, संजय दंडगव्हाळ, नंदू वराडे आदी उपस्थित होते.
कुसुमाग्रज जन्मशताब्दी
पेठे विद्यालयाच्या माजी विद्यार्थ्यांच्यावतीने कुसुमाग्रजांच्या जन्मशताब्दीनिमित्त रविवारी सकाळी ९ वाजता वेळूंजे येथील आदिवासी भागातील आश्रमशाळेत तात्यासाहेबांच्या कविता वाचन, गीत गायन, कुसुमाग्रजांच्या आठवणी, आश्रमशाळेस कुसुमाग्रजांची पुस्तके भेट देणे या कार्यक्रमाचे आयोजन करण्यात आले आहे. कुसुमाग्रजांचे आदिवासी भागावर अधिक प्रेम असल्याने माजी विद्यार्थ्यांनी जन्मशताब्दीचा पहिला कार्यक्रम खास करून नाशिक एज्युकेशन सोसायटीच्या वेळुंजे आश्रमशाळेत आयोजित केला आहे.

युतीमध्ये मनसे हा बालिशपणा - राज ठाकरे

युतीमध्ये मनसे हा बालिशपणा - राज ठाकरे

सकाळ वृत्तसेवा

Friday, February 25, 2011 AT 02:00 AM (IST)

 

मुंबई - भाजप व शिवसेनेच्या युतीमध्ये महाराष्ट्र नवनिर्माण सेनेचा समावेश करण्याच्या गोपीनाथ मुंडे यांच्या मताशी भाजप अध्यक्ष नितीन गडकरी यांनी अनुकूलता दर्शविल्यानंतर राज ठाकरे यांनी मात्र हा बालिशपणा असल्याची प्रतिक्रिया व्यक्त केली आहे.

नागपूर येथील एका खटल्यासाठी उपस्थित राहण्यासाठी राज ठाकरे आज सायंकाळी विदर्भ एक्‍स्प्रेसने रवाना झाले. त्या वेळी प्रसिद्धिमाध्यमांनी गडकरी यांच्या वक्तव्यासंदर्भात विचारले असता, राज ठाकरे म्हणाले, "हा बालिशपणा आहे. कोणीतरी बाहेरून विधाने करायची व त्यावर आम्ही आमची भूमिका कशी काय ठरविणार? प्रत्येक गोष्टीला एक प्रक्रिया असते. त्यामुळे या विषयावर मला काही बोलायची गरज आहे, असे वाटत नाही. तसेच या युतीबाबत माझे कोणाशीही बोलणे झालेले नाही वा मला कोणीही भेटले नाही. त्यामुळे ही गोष्ट होऊ शकत नाही.'

उद्या सादर होणाऱ्या रेल्वे अर्थसंकल्पातील अपेक्षांसंदर्भात ते म्हणाले, "रेल्वे अर्थसंकल्पात महाराष्ट्राने ज्या अपेक्षा व्यक्त केल्या त्या कधीच पूर्ण झालेल्या नाहीत. त्यामुळे अपेक्षा करण्यात काय अर्थ आहे? मुंबई व महाराष्ट्रात येणारे बोहरेचे लोंढे थांबवावेत, हीच आपली अपेक्षा आहे. या लोंढ्यामुळे येथील पायाभूत सुविधांवर ताण पडतो.'

सचिनला एफएसआय नाकारणे ही दुर्दैवी बाब

सचिनला एफएसआय नाकारणे ही दुर्दैवी बाब

-

Wednesday, February 23, 2011 AT 12:30 AM (IST)

 

मुंबई - महाराष्ट्राच्या मातीत दम आहे, पण जगविख्यात आंतरराष्ट्रीय क्रिकेटपटू सचिन तेंडुलकर याने आपल्याच घरासाठी कायदेशीररीत्या मागितलेला फक्त 300 चौरसफुटांचा "एफएसआय' नाकारणाऱ्या मुख्यमंत्री पृथ्वीराज चव्हाण यांच्या सरकारमध्ये दम नाही, अशी टीकेची झोड महाराष्ट्र नवनिर्माण सेनेचे अध्यक्ष राज ठाकरे यांनी उठविली. सचिनसारख्या सच्च्या क्रिकेटपटूला गुजरात व तामिळनाडू सरकारने स्वतःहून जागा दिली असती, पण महाराष्ट्र सरकारने त्याला "एफएसआय' नाकारणे ही अतिशय दुर्दैवी व लाजिरवाणी गोष्ट असल्याची खरमरीत टीकाही राज ठाकरे यांनी केली.

वांद्रे पश्‍चिम येथील हिल रोडवर सचिन बंगला बांधत असून त्या बंगल्यात त्याला स्वतंत्र जीम बांधायची आहे, त्यासाठी त्याला अतिरिक्त एफएसआयची गरज आहे. त्यासाठी सचिनने किमान 250 ते 300 चौ. फूट अतिरिक्त एफएसआय मिळावा यासाठी नगरविकास विभागाकडे अर्ज केला होता. पण सचिनला अतिरिक्त एफएसआय देण्यास नगरविकास विभागाने नकार दिल्याचे वृत्त वाचून आपणास अतिशय खंत वाटली, असे राज ठाकरे यांनी स्पष्ट केले.

मुंबई, ठाणे, पुणे, नाशिकसारख्या शहरांमधील अनधिकृत झोपड्यांवर कोणीही कायद्याचा बडगा उगारीत नाही. सुमद्रकिनारीही बिनधास्तपणे बेकायदा बांधकामे केली जातात. असंख्य लोक "आदर्श'पणे एफएसआय ढापतात. पण सचिनसारख्या जगविख्यात खेळाडूला सरकार एफएसआय कशी नाकारू शकते, असा सवालही त्यांनी या वेळी उपस्थित केला. जर त्यांनी परवानगी न मागताच बांधकाम केले असते तर मग नगरविकास विभागाने काय नंतर तपासणी केली असती का, असेही ठाकरे यांनी नमूद केले.

महाराष्ट्राच्या बाहेरून येथे येऊन अनधिकृतपणे झोपड्या बांधायच्या. कालांतराने या झोपड्या अधिकृत करून बाहेरच्या लोकांना अधिकृतपणे घर सरकार देऊ शकते. सचिन गुजरात किंवा तामिळनाडूसारख्या राज्यात जन्माला आला असता तर तेथील सरकारने सचिनला काय काय दिले असते. पण पृथ्वीराज चव्हाण यांच्याकडेच असलेल्या नगरविकास खात्याकडून एकही फाईल हलत नसताना नेमकी सचिनच्याच फाईलला या विभागाने कसा काय नकार दिला? मुख्यमंत्र्यांनी उलट ही फाईल स्वतःहून मागवून घेऊन त्यावर कार्यवाही करणे आवश्‍यक होते, असे मतही त्यांनी व्यक्त केले.

सर्वपक्षीय आवाहनया संदर्भात आपण मुख्यमंत्री पृथ्वीराज चव्हाण यांना पत्र देणार आहोत. पण सचिनसाठी सर्वच राजकीय पक्षांनी एकत्र यावे व मुख्यमंत्र्यांकडे मागणी करावी यासाठी सर्वच राजकीय पक्षांशी आपण बोलणार आहोत, असेही राज यांनी नमूद केले.

विधान परिषद निवडणुकीवर मनसेचा बहिष्कार!

विधान परिषद निवडणुकीवर मनसेचा बहिष्कार!

सकाळ वृत्तसेवा

Sunday, February 20, 2011 AT 12:00 AM (IST)

 

संजय मिस्कीन
मुंबई - विधान परिषदेच्या दोन जागांसाठी होणाऱ्या मतदानावर बहिष्कार टाकण्याचा निर्णय महाराष्ट्र नवनिर्माण सेनेने घेतला आहे. राज्यातील आघाडी सरकारच्या कार्यपद्धतीवर नाराजी व्यक्‍त करण्यासाठी पक्षाध्यक्ष राज ठाकरे यांनी हा निर्णय घेतल्याचे सूत्रांनी सांगितले. यामुळे मनसेचे विधानसभेतील 13 आमदार आणि नाशिक स्थानिक स्वराज्य संस्था मतदारसंघातील नगरसेवक आणि स्थानिक लोकप्रतिनिधी विधान परिषदेसाठी होणाऱ्या मतदानात सहभागी होणार नसल्याचे स्पष्ट झाले आहे. 
दोन जागांसाठी होणाऱ्या विधान परिषद निवडणुकीच्या पार्श्‍वभूमीवर मनसेच्या भूमिकेकडे राजकीय वर्तुळाचे लक्ष लागले होते. आघाडी आणि शिवसेना यांच्या उमेदवारांत सरळसरळ लढत होत असल्याने मनसेची मते कोणाच्या पारड्यात जातात, याची उत्सुकता दाटली होती. आघाडी आणि युतीच्या उमेदवारांपैकी कोणालाही मतदान केले, तरी मनसेला राजकीय टीकेला सामोरे जावे लागले असते. त्यामुळे राजकीय आरोप-प्रत्यारोपांच्या चर्चेला रोखत "झाकली मूठ' कायम राहावी यासाठी मनसेने मतदानावर बहिष्कार घालण्याची सावधगिरी बाळगल्याचे मानले जात आहे.

राष्ट्रवादीच्या प्रयत्नांवर पाणी
या निवडणुकीत मनसेच्या मतांना खेचण्यासाठी राष्ट्रवादी कॉंग्रेसच्या नेत्यांनी प्रयत्न सुरू केले होते. काही मनसे आमदारांना राष्ट्रवादीच्या नेत्यांनी दूरध्वनी करून आघाडीच्या उमेदवाराला मदत करण्याची विनंतीही केल्याचे समजते. मनसेच्या 13 आमदारांनी आघाडीचे उमेदवार किरण पावसकर यांना मतदान करावे, असे साकडे घालण्यात आले होते; मात्र मनसेचे आमदार हर्षवर्धन जाधव यांना पोलिसांनी केलेल्या अमानुष मारहाणीचा तीव्र संताप मनसे आमदारांमध्ये आहे. त्यामुळे विधान परिषद निवडणुकीत मनसेने सहभागी होऊ नये, अशी भूमिका काही आमदारांनी राज ठाकरे यांच्यापुढे मांडली होती. तसाच निर्णय राज यांनी घेतल्याने राष्ट्रवादी कॉंग्रेसच्या प्रयत्नांवर पाणी पडले आहे.

युतीनेच झंडू बाम लावत बसावे- राज

युतीनेच झंडू बाम लावत बसावे- राज

सकाळ वृत्तसेवा

Wednesday, February 16, 2011 AT 01:28 PM (IST)

 

नाशिक - शिवसेनाप्रमुख बाळासाहेब ठाकरे यांनी मनसेसारख्या झंडू बामची युतीमध्ये गरज नसल्याचे वक्तव्य केल्यानंतर आज (बुधवार) मनसेचे अध्यक्ष राज ठाकरे यांनी शिवसेनेला प्रत्युत्तर दिले. राज ठाकरे यांनी युतीनेच झंडू बाम लावीत बसावे, आम्हाला युतीची गरज नाही, असा टोला लगाविला आहे.

आजपासून नाशिक दौऱ्यावर असलेले राज ठाकरे यांनी पत्रकारांशी बोलताना युतीचा प्रस्ताव नाकारला. राज म्हणाले, ''आम्हाला शिवसेना, भाजप आणि मनसे असा युतीचा कोणताही प्रस्ताव मिळालेला नाही. आगामी काळात येणाऱ्या निवडणुकीत स्वतंत्र लढण्याचे आमचे धोरण आहे. भाजप नेते गोपीनाथ मुंडे यांनी केलेल्या वक्तव्यामुळे ते स्वतः बदनाम होतील.

मनसे म्हणजे "झंडू बाम'

मनसे म्हणजे "झंडू बाम'

वृत्तसंस्था

Wednesday, February 16, 2011 AT 12:15 AM (IST)

 

मुंबई - मुंबई महापालिकेत सत्ता मिळविण्यासाठी शिवसेना-भाजप युतीमध्ये महाराष्ट्र नवनिर्माण सेनेचा समावेश करण्याची कल्पना मांडणारे भाजपचे ज्येष्ठ नेते गोपीनाथ मुंडे यांना शिवसेनेने आज झटका दिला. मनसे म्हणजे "झंडू बाम' असून ही बाटली तुमच्याच खिशात ठेवा, असा खरमरीत इशारा शिवसेनाप्रमुख बाळासाहेब ठाकरे यांनी "सामना'च्या अग्रलेखातून दिला.

मुंबई महापालिकेत शिवसेना-भाजपला सत्ता मिळवायाची असेल, तर शिवसेना-भाजप यांच्याबरोबर मनसेला सोबत घ्या, असा आग्रह मुंडे यांच्याकडून गेल्या आठवडाभरापासून सुरू होता. शिवसेनेने मात्र मुंडे यांच्या कल्पनेतील त्रिपक्षीय युतीबाबत कुठेही भाष्य केले नव्हते. त्यामुळे शिवसेना गप्प असल्याची चर्चा राजकीय वर्तुळात सुरू होती; पण आज शिवसेनेच्या मुखपत्रातून शिवसेनाप्रमुखांनी मुंडे यांच्या कल्पनेतील स्वप्नांना थेट सुरुंग लावला. मनसे हा झंडू बाम असून त्यांच्यासमवेत युतीचा प्रश्‍नच उद्भवत नाही, असे या अग्रलेखात स्पष्टपणे सांगितले आहे; पण ज्यांना मनसे या "झंडू बाम'बरोबर युती हवी आहे, त्यांनी त्या बामची बाटली खिशातच ठेवावी, अशी उपरोधिक टीका शिवसेनाप्रमुखांनी अप्रत्यक्षरीत्या केली आहे.

हिंदुत्वाच्या मुद्द्यावर गेल्या 22 वर्षांपासून झालेली ही युती म्हणजे "आदर्श घोटाळा' नसून राष्ट्रीय विचारांची उसळलेली लाटच आहे, असे स्पष्ट करतानाच ठाकरे यांनी, महाराष्ट्रातील युतीकडे सगळ्यांचे लक्ष असते. त्यामुळे या युतीचा पाया मजबुत राहणार नसेल, तर लोक कळसही चोरून नेतील, असा उपरोधिक टोलाही मुंडे यांना मारला आहे.

मुंडे कोण बोलणारे?

शिवसेना-भाजप युतीमध्ये अन्य कुठला पक्ष पाहिजे वा नको, हे ठरविणारे व बोलणारे गोपीनाथ मुंडे कोण? असा रोखठोक सवाल शिवसेनेचे खासदार संजय राऊत यांनी केला आहे. युती ही एकट्या मुंडे यांची नाही, तर शिवसेना-भाजपची आहे. त्यामुळे युतीमध्ये कोण असावे व नसावे, याचा निर्णय शिवसेनाप्रमुख व उद्धव ठाकरे घेण्यास समर्थ आहेत. राजकारणात अशक्‍य असे शक्‍य करण्याची भाषा बोलणारे मुंडे हेही कधीतरी शिवेसेनेत येण्यास अतिशय उत्सुक होते, असा गौप्यस्फोटही खासदार राऊत यांनी केला.

मुंडेंचा मनसे युतीचा प्रस्ताव योग्यच

मुंडेंचा मनसे युतीचा प्रस्ताव योग्यच

सकाळ न्यूज नेटवर्क

Wednesday, February 16, 2011 AT 12:45 AM (IST)

 

मुंबई - भाजप नेते गोपीनाथ मुंडे यांनी मुंबई महापालिका निवडणुकीसाठी महाराष्ट्र नवनिर्माण सेनेला बरोबर घेण्याचा मांडलेला प्रस्ताव योग्यच असल्याचे मत शिवसेनेतील काही ज्येष्ठ नेत्यांनी खासगीत व्यक्‍त केले आहे. मुंबईत मराठीपेक्षा हिंदी भाषकांचे प्रमाण अधिक असल्याने सत्तेच्या चाव्या राखण्यासाठी उद्धव आणि राज या दोन्ही भावांनी एकत्र येणे आवश्‍यक आहे; मात्र त्यांच्यातून विस्तव जात नसल्याने हा प्रस्ताव पुढे न्यायचा तरी कसा, असा प्रश्‍न शिवसेना नेत्यांना पडला आहे.

मुंबई महापालिका हाती राखणे शिवसेनेसाठी आवश्‍यक आहे. लोकसभा निवडणुकीत मनसेने खेचलेल्या मतांमुळे शिवसेनेचे उमेदवार पराभूत झाले होते. मनसेचा जोर आजही कायम आहे का, याचा विचार करायला हवा; मात्र तो वस्तुनिष्ठपणे व्हावा, असा दृष्टिकोन सेनेत दबक्‍या आवाजात मांडला जात होता. त्यातच मुंडे यांनी तीन पक्षांची मोट बांधण्याचे विधान केले. शिवसेनेने "सामना' या मुखपत्रात अग्रलेख लिहून मुंडे यांचा प्रस्ताव धुडकावून लावला असला तरी भाषा नेहमीप्रमाणे जहाल नाही. मराठी मते एकत्र आल्याशिवाय सत्ता राखणे कठीण असल्याचे मत या पार्श्‍वभूमीवर शिवसेनाप्रमुखांसमोर मांडणे अगदीच अशक्‍य नसल्याचे मानले जाते आहे.

शिवसेनेतील मैत्रीवादी गटाने मराठी टक्‍क्‍यांची; तसेच लोकसभा-विधानसभा निवडणुकीतील मतांची आकडेवारी तयार केली आहे. हा विषय समोर आणणे आवश्‍यक असल्याचे मत समविचारी नेत्यांच्या कानी घातले आहे. शिवसेनेचे कार्याध्यक्ष उद्धव ठाकरे आणि मनसेचे सर्वेसर्वा राज ठाकरे यांच्यातून विस्तव जाणेही अशक्‍य असल्याने हा प्रस्ताव मान्य होणार नाही, याची कल्पना असली तरी मतांचे राजकारण लक्षात घेता तो मांडण्याशिवाय पर्याय नसल्याचे एका नेत्याने नमूद केले.

योग्य वेळी हा प्रस्ताव शिवसेनाप्रमुखांसमोर एखाद्या वरिष्ठ नेत्यामार्फत मांडावा, अशा विचारात ही मंडळी असतानाच भाजप नेते गोपीनाथ मुंडे यांनी जाहीरपणे एकीकरणाची भूमिका मांडल्याने दोन्ही भावांना सावध होता आले. त्यामुळे आता ही मांडणी पूर्वीपेक्षा काहीशी कठीण झाल्याचे बोलले जाते. कल्याण-डोंबिवली महापालिका निवडणुकीत तीव्र आरोप-प्रत्यारोप झाल्यानंतरही दोघांच्याही जागांत वाढ झाली ही भूमिका दोघे बंधू घेतील, अशी अपेक्षा पक्षातील नेते व्यक्त करीत आहेत.